Cilët janë pesë anëtarët që nuk marrin dot një vendim
Avokatë dhe ish-trajnerë të njohur, por edhe ish-drejtues policie. Komisioni i Etikës në FSHF u mandatua nga Asambleja e Përgjithshme e Federatës Shqiptare të Futbollit në mars të vitit të kaluar, teksa katër nga pesë anëtarë u rizgjodhën. FATMIR BRAKA - Kryetar është avokati i njohur Fatmir Braka, një prej juristëve më me emër në Shqipëri, Profil i lartë në fushën e drejtësisë i përzgjedhur për të drejtuar një prej komisioneve më të rëndësishme të federatës që u krijua përpara disa vitesh. Një njohës shumë i mirë i ligjeve dhe rregulloreve, por edhe i futbollit njëkohësisht. Një ndjekës i rregullt i ndeshjeve. BEJKUSH BIRÇE - Bejkush Birçe është personazhi më i njohur në Komisionin e Etikës që ka lidhje të drejtpërdrejtë me futbollin. Ai është zv.kryetar i komisionit. Ish-trajneri i Kombëtares së Shqipërisë, Partizanit, Dinamos dhe klubeve të tjera në vendin tonë, ka një pozicion të rëndësishëm në Komisionin e Etikës. Birçe akuzoi hapur në emisionin "fair play" në "News 24" një vit më parë për ndeshje të toleruara në Superiore. Çështje që hapi shumë debat, por u mbyll pa ndonjë vendim. Kujtojmë se të vetmet ekipe të dënuara në Superiore për trukime janë Bylis dhe Kastrioti të gjobitura disa vite më parë. AGRON KULIÇAJ - Një afrim i ri dhe surprizë në botën e futbollit ishte edhe Agron Kuliçaj. Deri pak vite më parë ai kishte mbajtur poste të rëndësishme drejtuese në Policinë e Shtetit. Ish-zv.drejtori i Policisë së Shtetit u zgjodh anëtar i Komisionit të Etikës gjatë Asamblesë së 2016-ës. Ai mori 50 vota në zgjedhjet e përpara një viti. BASHKIM KOKA - Ky i fundit është një njohje e vjetër në futboll, pasi dy dekada më parë ka shpallur kampion Teutën, duke qenë një trajner i suksesshëm me durrsakët. Ai mori vota më shumë se të gjithë anëtarët e tjerë të Komisionit të Etikës në zgjedhjet e 2016ës. Koka siguroi 55 vota.
ARDIAN LEKA - Ardian leka është avokat dhe një emër i njohur në fushën e drejtësisë në Shqipëri. Ai u zgjodh me 52 vota si anëtar i komisionit në votimin e një viti më parë.
Fatmir Braka
Bejkush Birçe
Agron Kuliçaj
Ardian Leka