Juventusi do të sakrifikojë Bonuçin, ja lista e dëshirave

Leonardo Bonuçi duket gjithmonë e më i bindur për të lënë Torinon. Të paktën për këtë është e sigurt media angleze, e cila ka listuar edhe disa arsye që nisin me sherrin e pasur me Masimiliano Alegrin, thuajse dyfishin e pagës që i garantojnë ishullorët, zhgënjimin e marrë nga dy finalet e humbura të Ligës së Kampioneve, por mbi të gjitha mungesën e stimujve për të vazhduar në SerinëA, duke parë se tashmë mbrojtësi ka gjashtë vite që fiton gjithçka në Itali. Dhe, nga ana tjetër, edhe vetë Juventusi duket shumë i joshur nga oferta e ardhur së fundmi nga Çelsi, e cila parakalon bindshëm atë të Mançester Sitit: 55 milionë euro, plus kartonin e mesfushorit Nemanja Vidiç, i cili i pëlqen aq shumë trajnerit të Juves. Por, në të njëjtën kohë, fakti se për të synuar Champions-in në sezonin e ardhshëm nevojitet një merkato e përbërë nga emra të mëdhenj dhe shumë miliona euro për t'u investuar, edhe vetë drejtuesit torinezë duket se janë gati që të pranojnë të sakrifikojnë Leonardo Bonuçin dhe më pas të nisin sulmin e tyre në merkato. Disa prej emrave tashmë janë të njohur nga të gjithë, por në krye të listës qëndrojnë Duglas Kosta i Bajernit të Mynihut dhe Stiven N'Zonzi i Sevijes. Për të parin nevojiten 40 milionë euro, por shumë do të varet nga zbarkimi ose jo i Aleksis Sançezit në Bavari. Ndërsa për të dytin, spanjollët kanë ulur pretendimet e tyre nga 40 milionët e klauzolës në vetëm 30 milionë, duke qenë se është vetë mesfushori francez që shtyn për një transferim te Juventusi këtë verë.