Modriç: Zidan një gjeni, ja si e mundi Juven

Zinedin Zidan nuk po mahnit vetëm specialistët e futbollit apo qoftë edhe kolegët e tij me më shumë eksperiencë, por edhe vetë lojtarët, të cilët stërvit çdo ditë. Finalja e Kardifit e fituar kundër Juves, me sa duket është një kryevepër e inteligjencës së tij taktike, pasi është vetë një prej yjeve të Realit të Madridit, Luka Modriç, ai që e konfirmon këtë. "Ajo që kemi bërë në këto dy vite të fundit është fantastike, sepse realisht po përjetojmë momente shumë të bukura. Dhe për këtë duhet të falënderojmë mbi të gjitha trajnerin Zinedin Zidan, i cili ka ditur që të na japë një shpirt të ri gare, një stil loje më dëfryes, por edhe më kompakt. Këtë e treguam fare mirë në finalen e Champions-it kundër Juventusit, një sukses i cili i duhet faturuar pa dyshim trajnerin tonë, - nënvizon fantazisti kroat. - Gjatë të gjithë javës që parapriu transfertën në Kardif, Zidan dhe stafi i tij kanë analizuar me kujdes shumë ndeshje dhe falë punës së tyre gjetën pikën e dobët në mbrojtjen e Juves. Nuk ka dyshime se mbrojtësit italianë janë fantastikë dhe këtë e treguan gjatë të gjithë sezonit europian, por zgjuarsia e 'Zizu'-së diti që t'i çajë ato. Ai vuri re se në thuajse të gjitha ndeshjet e rëndësishme dhe të vështira që kishte luajtur skuadra e Alegrit sivjet, ata ia kishin lënë topin kundërshtarit për ta luajtur dhe më pas për ta kapur në kundërsulm. Dhe fakt është që kur mbrojtja e Juves qëndron e palëvizshme dhe brenda zonës së saj, ata dinë të largojnë thuajse çdo tentativë, por duke parë presionin që ata na vunë në pjesën e parë, në 15 minutat e pushimit të pjesës së dytë, trajneri vendosi të ndryshojë skemë. Ai theksoi se kur mbrojtja italiane qëndron e palëvizur vështirë se vuajnë, por duke ia lejuar topin Juventusit dhe duke i afruar drejt zonës sonë, reparti i tyre do të çahej dhe nëse kapen në kundërsulm ata janë mjaft të dobët. Dhe realisht kështu ndodhi: ne e detyruam Juven që të fitonte në grup shumë metra drejt portës sonë dhe i goditëm saktësisht në kundërsulm. Më duhet t'i bëj komplimentet e mia trajnerit për këtë detaj, sepse ishte realisht ai çelësi i fitores sonë në finalen e Champions-it".