Mesi rinovon për 30 milionë euro

“Nuk kam asgjë personale me Kristiano Ronaldon, është ndër më të mirët në botë”

Gjithçka e përfund uar. Lionel Mesi dhe Barcelona kanë gjetur akordin për rinovimin e kontratës deri në vitin 2021 (kur edhe skadon mandati i presidentit aktual Bartomeu) me opsion shtyrjen edhe për një tjetër vit. Klauzola e prishjes së saj ka shkuar në shifrën astronomike të 400 milionë eurove nga 250 milionë që është në kontratën aktuale, e cila skadon në vitin 2018. Operacionin e konfirmon radioja spanjolle “Cadena Ser”. Ata kanë mësuar ende shifrat financiare që pritet të përfitojë ylli argjentinas. Mesi dhe klubi kanë rënë dakord në përmbajtjen e kontratës së re që ai të paguhet 30 milionë euro neto në sezon. Presidenti Bartomeu ka marrë personalisht pjesë në negociatat që për palën e futbollistit janë drejtuar nga babai i tij, Horge Mesi, i cili është njëkohësisht edhe menaxheri i sulmuesit. Firma në kontratën e re do të vijë pas 30 qershorit, për shkak të detyrimeve të reja financiare që hyjnë në fuqi në marrëdhëniet kontraktuale prej sezonit të ardhshëm.

PËRKËDHEL CR7 - “Është një lojtar fenomenal”. Dhe në këtë mënyrë Leo vlerëson rivalin e përjetshëm, Kristiano Ronaldon. Duket se janë të largëta momentet e tensionit mes të dyve. Pasi Reali ngriti Champions-in e dytë radhazi, ylli i Barcelonës u përgjigjet fjalëve të ngrohta të portugezit, i cili pak ditë më parë gjithashtu foli me superlativa për argjentinasin. “Ronaldo është një lojtar i jashtëzakonshëm. Ai ka

shumë cilësi, të cilat i ka treguar vit pas viti”, shpjegon Mesi për “Tencent Sport”, portalin kinez. “Nuk është një risi që ai është një prej më të mirëve në botë. Të gjithë e dinë”.

NUK KA RIVALITET – Mesi flet edhe për konkurrencën

me sulmuesin e Realit. “Rivaliteti mes nesh? Është një montim i shtypit, që e ka ekzagjeruar në krahasim me realitetin. Ajo që ne përpiqemi të bëjmë çdo vit është të japim më të mirën për skuadrat tona. Gjithçka thuhet jashtë fushës, nuk duhet t’i kushtojmë rëndësi”. 29- vjeçari konfirmoi edhe faktin që dëshiron të qëndrojë në Katalunjë. “Qëndrimi te Barça është gjithçka unë kam dashur, gjithçka unë kam ëndërruar gjithnjë. Unë e kam thënë se do të më pëlqente që ta mbyllja karrierën aty. Le të shohim se çfarë do të ndodhë”.