Europianët nisin "valsin", Holanda kërkon fitoren e shpresës

Sot në mbrëmje nis "valsi" i fundit sezonal për kualifikueset në Botërorin "Rusi 2018". Në grupin A, Suedia pret në Stokholm Francën për një ndeshje që vlen vendin e parë. Për ekipin e Jan Anderson pikët në këtë ndeshje shërbejnë jo vetëm për të mos humbur kontaktin me kreun, por edhe për të ruajtur distancën ndaj Bullgarisë së vendit të tretë që ndodhet vetëm një pikë larg skandinavëve. Holandezët e Dik Advokat me një këmbë jashtë Botërorit rus do të synojnë fitoren në shtëpi ndaj Luksemburgut duke shpresuar në dhuratat e Francës Bjellorusisë që pret Bullgarinë. Portugalia udhëton drejt Letonisë me besimin për tri pikët pasi skuadra kampione Europe ka disa ditë e grumbulluar në kuadër të Kupës së Konfederatave. Djemve të Fernando Santos u duhet një fitore me shpresën se Zvicra do të ngecë në transfertën ndaj Ishujve Faroe. Andorra e fundit në grupin B do të presë Hungarinë, të cilën vetëm matematika e mban ende në garë për një vend të dytë që duket më shumë se i pamundur. Për t'u nënvijëzuar është fakti që ylli i Realit të Madridit do të kërkojë golat e radhës për t'iu afruar sa më shumë Ferenc Pushkashit, i cili udhëheq me 85 golat e tij klasifikimin e golashënuesve më të mirë në nivel ekipesh kombëtare. Luzitani renditet në vendin e tretë me 71 gola së bashku me gjermanin Miroslav Klose. Grupi H gjithashtu luan ndeshjet e gjashta të fazës kualifikuese me Belgjikën që udhëton drejt Estonisë ku nevojitet fitorja për primatin e grupit. Belgët do të jenë me njërin vesh nga Bosnja ku vendësit presin Greqinë. Kjo përballje mund të vendosë një hipotekë të rëndësishme mbi pronësinë e vendit të dytë që mbahet nga helenët. Mbrëmja mbyllet me sfidën e Gjibraltarit ku Qipro do të përpiqet të marrë tri pikët ndaj vendësve modestë të vendit të fundit në grup.