Mavraj zbardh paktin e senatorëve
“U mblodhëm ne më të vjetrit pas humbjes në Luksemburg, në Izrael vetëm për fitore”
Mërgim Mavraj është kujdesur shumë që dje gjatë daljes në konferencën për shtyp, përpara ndeshjes së sotme me Izraelin, të marrë përgjegjësi bashkë me shokët e tjerë të skuadrës për humbjet e fundit të përfaqësueses. Ai ka fajësuar kryesisht gabimet individuale, të cilat kanë sjellë humbjet radhazi të përfaqësueses. Sot përballë Izraelit, Mavraj deklaron se do të kërkojnë vetëm fitoren, për të bërë që të harrohet ajo disfatë e para disa muajve në Elbasan. Mavraj tregon edhe për një mbledhje senatorësh në Kombëtare pas humbjes me Luksemburgun. "Në këto eliminatore, jo vetëm me Izraelin, por edhe me Spanjën, Italinë apo Maqedoninë, golat që kemi pësuar ishin gabimet tona individuale në mbrojtje. Edhe në sfidën e kaluar me Izraelin, ne ishim fajtorët e humbjes dhe ua falëm golat. Dhe sigurisht, reparti i mbrojtjes ka përgjegjësi për të ruajtur portën", tha ndër të tjera Mavraj gjatë konferencës së djeshme për shtyp. Ndërkaq, lojtari që sot do të mbajë shiritin e kapitenit, bëri të ditur se synimi i përfaqësueses do të jetë fitorja në takimin e sotëm me Izraelin. "Ne kemi ardhur për të fituar dhe nuk futemi në fushë vetëm për një pikë. Mjafton të luajmë mirë dhe synimi ynë është që të fitojmë".
Humbja e parë në Elbasan me Izraelin na erdhi pikërisht për shkak të disa gabimeve në repartin e prapavijës. Mendon se kemi një mbrojtje më të brishtë në krahasim me atë që kemi pasur në eliminatoret e kaluara?
Humbja me Izraelin në Shqipëri na ka dhembur shumë, dhe jo vetëm rezultati, por edhe mënyra. Një humbje që na ka zhgënjyer shumë jo vetëm ne si lojtarë, por të gjithë shqiptarët, pasi prisnin një rezultat pozitiv dhe një lojë gjithashtu të mirë. Edhe gjatë lojës dëmtuam veten, pasi kur luanim 11 kundër 11, loja ishte e barabartë. Në këto eliminatore, jo vetëm me Izraelin, por edhe me Spanjën, Italinë apo Maqedoninë, golat që kemi pësuar ishin gabimet tona individuale në mbrojtje. Edhe në sfidën e kaluar me Izraelin, ne ishim fajtorët e humbjes dhe ua falëm golat. Dhe sigurisht, reparti i mbrojtjes ka përgjegjësi për të ruajtur portën. Nuk besoj se ka ndonjë ndryshim mbrojtja e tanishme me atë përpara Europianit. Mos harroni se ka ndryshuar edhe mënyra e lojës, pasi nuk tërhiqemi vetëm në mbrojtje, por duhet të luajmë topin me pasime të qarta dhe të bukura. Dhe në këtë aspekt nuk e kemi shumë të lehtë, sidomos me ekipe që janë më të dobëta se ne, për shembull, me Lihtenshtejnin ose Luksemburgun që luajtëm së fundmi. Besoj se në këtë aspekt duhet të përmirësohemi shumë.
A ka një çështje për shiritin e kapitenit në Kombëtare?
Jo, nuk ka asnjë çështje. Mua personalisht, por edhe çunave të tjerë nuk u intereson fare kjo gjë. E rëndësishme është që të kemi një mendim të njëjtë për një lojë të qartë gjatë ndeshjeve.
Çfarë ka ndryshuar me mbrojtjen me eliminatoret e kaluara, kur pësonim shumë më pak? Tashmë, mjafton të kujtojmë pesë ndeshjet e fundit, ku kemi pësuar 11 gola, për të parë se diçka nuk shkon...
Mendoj se janë gabime individuale që nuk na ndodhin vetëm ne. Janë shumë skuadra në botë që pësojnë
gola për shkak të gabimeve individuale. Nuk janë vetëm 4 lojtarët e repartit të mbrojtjes, por për të mbrojtur portën duhen 11. Edhe më parë jemi ndëshkuar nga gabimet tona dhe jo nga rastet që kanë krijuar kundërshtarët. Nuk është se mungon motivimi dhe përqendrimi, por në të tilla nivele, kundërshtari shfrytëzon çdo rast e të ndëshkon. Duhet të gabojmë sa më pak.
Si është përgatitur skuadra pas asaj humbjeje me Luksemburgun? Si ka qenë atmosfera brenda në përfaqësuese?
Që nga dita e parë që unë jam pjesë e Kombëtares shqiptare, atmosfera ka qenë gjithmonë e shkëlqyer. Sigurisht, ajo humbje me një kundërshtar më të dobët se ne siç ishte Luksemburgu, nuk lë shije të mirë. Edhe ne si lojtarë kemi pasur nevojë që të diskutojmë dhe të shihnim se çfarë nuk shkoi në Luksemburg. Ne lojtarët më të vjetër të Kombëtares jemi ulur dhe kemi diskutuar pas humbjes me Luksemburgun për të qenë më të qartë me mënyrën e lojës dhe atë çfarë duhet të bëjmë për të fituar në Izrael.
Duke parë gjendjen e
skuadrës me disa humbje radhazi, në sfidën e nesërme (sot) ndaj Izraelit, do të synohet vetëm fitorja, apo do të jeni të kënaqur edhe me një barazim?
Dëshira ime personale është që të dalim faqebardhë nga kjo ndeshje. Është një mundësi për të fituar dhe për të rikthyer atë eufori që kemi pasur, jo vetëm në ekip, por te të gjithë shqiptarët.
Pra, nesër (sot) jemi për...? Ne kemi ardhur për të fituar dhe nuk futemi në fushë vetëm për një pikë. Mjafton të luajmë mirë dhe synimi ynë është që të fitojmë.