Rrezik kartonësh, 6 spanjollë mund të humbin Italinë
Pike, Ramos, Buskets, Tiago, Vitolo e Kosta në ankth
Spanja e Hulen Lopete guit përgatitet të luajë sot ndaj Maqedonisë, ndeshja e gjashtë eliminatore për Grupin G, ku bën pjesë edhe Shqipëria. Transferta e Shkupit është tepër e rëndësishme për "Furitë e kuqe", duke parë se Italia nga ana e saj ka një duel, të paktën në letër, shumë të thjeshtë kundër Lihtenshtejnit, prandaj fitorja është një detyrim për Alvaro Moratën me shokë. Gjithsesi, nëse në lidhje me formacionin trajneri i iberikasve nuk ka asnjë problem, përkundrazi ka luksin e zgjedhjeve, ankthi i vetëm që ngrihet përpara kësaj sfide lidhet me numrin e madh të lojtarëve që kanë një karton të verdhë të mbartur. Kjo do të thotë se në rast të një ndëshkimi të radhës në Maqedoni, gjashtë prej tyre do të humbin ndeshjen e radhës kundër Italisë, e cila është programuar për t'u zhvilluar më datë 2 shtator 2017, në stadiumin "Santiago Bernabeu". Dhe për këtë duel, Lopetegui e di mirë se duhet të ketë grupin e tij të plotë, pasi sfida me "axurrët" do të vendosë edhe kokën e grupit, i cili aktualisht mbahet nga "Furitë e kuqe", por vetëm si rrjedhojë e golavarazhit fantastik, pasi
pikët janë të njëjta, 13 dhe dueli i parë ka përfunduar në barazim 1-1. Natyrisht që kundër Maqedonisë, trajneri Lopetegui kërkon që futbollistët e tij të mos e kenë këtë ankth mbi shpatulla, sepse mund të kushtëzonte paraqitjen e sotme, por natyrisht që edhe një paralajmërim
për të luajtur qetë dhe pastër do të ketë. Dhe emrat që rrezikojnë përbëjnë shtyllën kurrizore të skuadrës, duke nisur me qendërmbrojtësit Xherrard Pike dhe Serxho Ramos, shkatërruesin e mesfushës Serxhi Buskets, mesfushorët Tiago Alkantara e Vitolo, si dhe
bomberi Diego Kosta. Prandaj, të gjithë këta duhet të jenë ata që duhet të ruhen më shumë sot kundër Maqedonisë, përndryshe, më 2 shtator, do t'u duhet ta ndjekin sfidën me Italinë nga tribuna, duelin që do të vendosë përfundimisht se cili do të kualifikohet direkt për në Rusi.