Çela tregon objektivat e Superiores
Lushnja do të jetë e vetmja skuadër e qarkut të Fierit dhe e të gjithë zonës së Myzeqesë që do të luajë në Kategorinë Superiore. Lushnja rikthehet në Superiore me entuziazëm dhe me tifozë. Një skuadër që tradicionalisht ka dhënë më të mirën kundër të mëdhenjve. "Jemi të nderuar që do të përfaqësojmë të gjithë zonën. Jemi skuadra më e mirë dhe e kemi merituar", thotë kapiteni i lushnjarëve, Gentian Çela. Verdhejeshilët e arritën elitën duke u mbështetur më së shumti te futbollistët vendës, të cilët kanë shumë kohë që luajnë bashkë. Një shembull suksesi që pritet t'i mbijetojë edhe Superiores. "Shpresojmë shumë që të ndërtohet një skuadër konkurruese në Kategorinë Superiore. Futbolli është i papritur dhe gjërat nuk janë të prera. Besoj se do të mobilizohemi më shumë dhe me entuziazmin sportiv që ka Lushnja të përpiqemi të arrijmë mbijetesën. Vendi i shtatë apo i tetë do të ishte një tjetër sukses nga ana jonë", deklaroi mesfushori "veteran" i verdhejeshilëve. Futbollistët lushnjarë kanë kontrata sezonale, të cilat u mbarojnë në fund të sezonit. "Jam i gatshëm për të rinovuar dhe për t'i shërbyer ekipit", tha kapiteni Çela. Mesfushorit 36-vjeçar i mjaftuan pak minuta për të vënë në punë eksperiencën e tij në dobi të verdhejeshilëve. Njeriu-asist dhe specialisti i goditjeve të dënimit prodhoi gola verdhejeshilë, që ndikuan për një fund të lumtur. "Për mua është kënaqësi të shënoj dhe t'u shërbej sulmuesve Canka e Sefa, për të ndarë gëzimin e suksesit me ta. Është një kënaqësi e veçantë të gëzoj mijëra tifozët e Lushnjës. Me bindje e them që Lushnja do të jetë kampione për numrin e tifozëve", mbylli kapiteni. Alban Alushi