Doçi bën polemika me Pëllumbin

Kreu i Agjencisë të Shërbimit të Sporteve, pretendime për shmangien e Mjekësisë Sportive

Përfaqësimi i Shqipërisë në volejbollin e femrave, për të dytin vit radhazi në Ligën e Europës, për më tepër me një arenë sportive të re, nuk i ka shuar konfliktet në komunitetin sportiv. Pak përpara premierës në sallën sportive të lojërave me dorë "Feti Borova" në Parkun Olimpik mësohet se ka pasur edhe një polemikë mes drejtorit të Agjencisë së Shërbimit të Sporteve, Bledar Doçi dhe presidentit të Federatës Shqiptare të Volejbollit, Erlind Pëllumbi. Mësohet se Doçi ka shprehur rezerva për mospërfshirjen në stafin teknik të kombëtares, specialistë fizioterapistë nga radhët e Mjekësisë Sportive, e cila është nën juridiksionin e AGJS-së. Doçi mësohet se ka pasur pretendimet se, përse Federata kishte zgjedhur fizioterapistë privatë. Madje, këtë shqetësim drejtori i Agjencisë që, për momentin ka nën administrim Parkun Olimpik deri në momentin e dorëzimit te Bashkia Tiranë të Parkut Olimpik, e ka shprehur edhe një postim në rrjetin social "Facebook". Gjithashtu, Doçi e quajti të pavend nga ana e federatës që në ambientet e brendshme të Parkut Olimpik mungonin banesa me logon e Bashkisë së Tiranës dhe Ministrisë së Arsimit dhe Sportit. "Urime trajnerëve dhe vajzave të volejbollit shqiptar për punën e palodhur dhe të përkushtuar për të përfaqësuar ngjyrat kuq e zi në këtë turne paraeliminator. Një vërejtje për Federatën Shqiptare të Volejbollit që injoroi institucionet shtetërore si MAS (Ministria e Arsimit dhe Sportit) apo Agjencinë e Sportit duke mos vënë minimalisht logon e MAS-it apo edhe të Bashkisë Tiranë në banderolat e evenimentit, si edhe duke mos bashkëpunuar me sektorin e Mjekësisë Sportive pranë Agjencisë së Shërbimeve të Sportit, gjë e cila nuk ka ndodhur me Federatat e tjera Sportive deri më sot. Forca Shqipëri!".