Teuta prenoton një agjenci italiane për përforcime “big”

Teuta i ka idetë e qarta për të ardhmen. Sezonin tjetër klubi do të ketë pretendime madhore dhe, për këtë motiv, drejtuesit janë duke vendosur në zbatim një projekt ambicioz. Për të bërë goditjet e duhura në merkato, mësohet se klubi do të lidhë bashkëpunim me një agjenci italiane, kompani e licencuar nga FIFA për menaxhimin e futbollistëve. Të shtunën është prenotuar takimi i parë, kur pritet që të diskutohet gjerësisht për prurjet e reja. Vlen që të theksohet se e njëjta agjenci ka sjellë një vit më parë në Durrës sulmuesin nga Mozambiku, Faizal Bangal. Kompania në fjalë ka një eksperiencë të madhe në transferimin e lojtarëve të huaj në Ballkan. Por jo vetëm kaq, pasi njohja e klubit me agjencinë është e vjetër, ndërsa kohë më parë u bën ndërmjetësues për të sjellë si trajner te Teuta, Lukarelin e famshëm. Por, në atë kohë, u preferua Cevoli. Menaxherët bashkëpunojnë akademitë dhe skuadrat e Udinezes, Xhenoas e Atalatës në Itali, ndërsa në Angli me Totenhem, Chelsea e Birmingam. Nisur nga serioziteti i kësaj agjencie, në klub besojnë se prurjet e reja do të jenë cilësorë. Edhe pse numri i lojtarëve që do të afrohen është i madh. Konfirmimi për takimin vjen nga vetë Gugash Magani, i cili thotë: "Pas bisedës që kam pasur me presidentin dhe me sponsorin Bardhi kemi lënë takim ditën e shtunë me një menaxher italian. Do të shikojmë alternativat që ai ka dhe gjithashtu do t'i paraqesim kërkesat tona për lojtarët dhe pozicionet që na duhen". Ndërkohë, Teuta për momentin ka vetëm shtatë lojtarë të konfirmuar, konkretisht: Çyrbja, Shkalla, Hila, Tarik, Sykja, Shehi dhe Beqja. Ndërkohë që priten të mbeten në Durrës edhe Papa, Progni, Markoviç, Hodo apo edhe Musta. Jeton Rexhmati