“Fanatics” para bashkisë, protestë bashkë me legjendat
300 të pranishëm, mister mungesa e krerëve të grupit
Të lodhur nga kriza dhe premtimet e pambajtura, tifozët kanë "zaptuar" sërish godinën e Bashkisë së Tiranës. Pas asaj së 31 majit dhe apelit të vazhdueshëm publik për t'i dhënë zgjidhje situatës që po kalon klubi më i titulluar në vend, "Tirona Fanatics" dje kishin programuar protestën e radhës. Edhe pse paqësisht, ata nuk tërhiqen nga kërkesa e tyre. Tifo-grupi kërkon prej kryebashkiakut, që është njëherësh zotërues i 34% të aksioneve, që të marrë masa ndaj Refik Halilit. Ashtu sikundër kishin paralajmëruar, ata mëshuan para institucionin vendor dhe në orën 18:10 nisën që të protestonin. Tifozët njoftuan se do t'i shkojnë deri në fund nismës së tyre, derisa Bashkia Tiranë, si bashkëpronare, t'i japë drejtim problematikës. "Tirona nuk është mall për pazar", ishte kjo banderola e shpalosur prej tifozëve. Nuk qëndruan më shumë se 10 minuta, e megjithatë domethënëse ishte prezenca e legjendave bardheblu në këtë protestë. Ndërsa nisën koret e tyre të zakonshme dhe me tymueset e shumta në sfond, 300 të pranishmit mbanin në duar foto të Selman Stërmasit, Arben Mingës, Artur Lekbellos, Josif Kazanxhiut dhe Ali Memës. Personazhe këto që e kanë udhëhequr këtë klub drejt sukseseve të njëpasnjëshme. Në pritje të përgjigjes së kryebashkiakut, tifozët paralajmëruan se protestat do të përshkallëzohen, por pa dhënë detaje të mëtejshme. Megjithatë, vlen të evidentohet që mister mbetet mungesa e krerëve të këtij grupimi. Asnjë prej tyre nuk ishte i pranishëm, ndërsa pjesë e protestës u bënë edhe tifozë të thjeshtë. Sakaq, çudia shtohet me faktin që në faqen e tyre zyrtare nuk ka asnjë postim për atë që ndodhi dje. Në një nga momentet më të errëta të historisë së Tiranës, e cila në vitin e 96-të të krijimit ra nga kategoria, po bën llogaritë edhe pa tifozët. Skuadra është në kaos të plotë dhe kjo shihet edhe nga pasiviteti i klubit. Edhe pse e dinë që do të luajnë në Ligën e Europës, nuk kanë nisur as nga "A"-ja. Nuk i janë dhënë drejtim një mori çështjesh, që nisin me trajnerin, e mbyllen me rinovimet apo blerjet e reja. Asnjë projekt i shpalosur, edhe pse fiks pas dy javësh do të zbresin në fushë për të luajtur ndeshjen e parë.