“Divorci” me Josën, Tirana paguan 31 mijë €
Bardheblutë nisin stërvitjen, Hoxhallari oferta nga Kroacia
Largohet Mirel Josa. Trajneri nuk është më në krye të Tiranës. Ajo që është përfolur prej më shumë se dy javësh, dje u bë zyrtare. Gjatë paradites, konkretisht rreth orës 09:30, presidenti Refik Halili është takuar me 54-vjeçarin për të biseduar dhe dhënë drejtim kësaj çështjeje që u kthye në "telenovelë". Pas një marrëveshje dypalëshe, kanë vendosur që të ndërpresin para kohe kontratën. Tekniku do të përfitojë vetëm pagat e prapambetura, ndërsa i ka "falur" klubit detyrimet për sezonin tjetër, atë 201 ? - 2018, për të cilin kishte edhe kontratë. Nga sa bëhet e ditur, ai kishte një rrogë prej afro 4500 eurosh në muaj, ndërsa konkretisht flitet që ka për të marrë nëntorin, dhjetorin, janarin, shkurtin, marsin, prillin dhe majin. Me një llogari të thjeshtë, i bie që Tirana i detyrohet Josës afro 31.500 euro. Pas "paktit" të arritur dhe garancisë që javën tjetër do të shlyhet, është gjentur gjuha e përbashkët dhe rrjedhimisht ka ardhur "divorci".
KONFIRMIMI I JOSËS Mirel Josa i kontaktuar nga "Panorama Sport" ka konfirmuar largimin e tij, megjithatë saktëson se javën tjetër ka për të mbyllur "hesapet" financiare. "Unë do të flas javën tjetër, pasi të mbyllen që të gjitha detyrimet që
ka klubi karshi meje. Ndoshta do të dal me ndonjë konferencë për mediat, megjithatë mund të konfirmoj vetëm kaq fillimisht, që prej ditës së sotme (dje) nuk jam më trajner i Tiranës", u shpreh shkurtimisht trajneri për "Panorama Sport", i cili e drejtoi Tiranën për 2? javë kampionat.
ODISEJA E "DIVORCIT" Që pas mbylljes së kampionatit, kur Tirana ra nga kategoria për të parën herë në historinë 9 ? - vjeçare, pritej largimi i trajnerit. Megjithatë, kjo gjë nuk ndodhi, pasi bardheblutë kishin për të luajtur edhe një finale, atë të Kupës së Shqipërisë. Kryeqytetasit fituan ndaj Skënderbeut dhe rrjedhimisht kanë të drejtën që të luajnë në Ligën e Europës. Megjithatë, "letargjia" shoqëroi ambientin bardheblu që pas 31 majit. Edhe pse kontaktet mes trajnerit dhe presidentit kanë qenë të vazhdueshme, mungonte konsensusi. Madje, u kuptua qartazi që çështja ngecte te paratë. Drejtuesit hezitonin që ta shkarkonin nga droja për një tjetër gjyq, ndaj vetë trajneri nuk mund të jepte dorëheqje, pasi kishte rroga të prapambetura. Ndaj, forma e vetme që t'i jepnin drejtim kësaj odiseje ishte konsensusi. Pas 15 ditësh me negociata, shtyrje, driblime dhe "ngritje", më në fund dje u vendos që kontrata të prishej me vendim prej të dyja palëve. Kjo ishte e vetmja mënyrë për të shmangur pasojat.