Skënderbeu ngec edhe në testin e dytë, mundet nga Videoton
Skënderbeu vijon sërish me humbje edhe në ndeshjen e dytë miqësore të zhvilluar në Slloveni. Këtë herë përballë Videotonit, nënkampionëve të Hungarisë, bardhekuqtë ndëshkohen në pjesën e dytë nga një gol i pësuar pas një shpërqendrimi në mbrojtje në minutën e 59- të. Ekipi i trajnerit Ilir Daja ka treguar qëndrueshmëri në këtë takim, sidomos në pjesën e parë, ku ka pasur mundësinë të ndëshkojë kundërshtarin, por tregoi edhe një herë se Skënderbeut i mungon njeriugol. Bardhekuqtë regjistrojnë kështu humbjen e dytë, në po kaq miqësore të zhvilluara në Slloveni, por pavarësisht kësaj trajneri i Skënderbeut është besimplotë dhe i kënaqur nga puna që ka bërë skuadra, pasi ngarkesa ka qenë e plotë, madje me dy seanca stërvitore në ditë. Marko Radas, Donjet Shkodra, Sabjen Lilaj dhe Gledi Mici nuk e filluan ndeshjen nga fillimi. Mësohet se stafi teknik nuk ka dashur që t'i sakrifikojë, për shkak të ngarkesës stërvitore, si dhe Radas kishte vetëm 24 orë me ekipin në Slloveni. PJESA E PARË - Korçarët e fillojnë mirë takimin dhe janë dominues të ndeshjes deri në minutën e 35- të. Gjithçka fillon me ritmin e duhur për Skënderbeun, që i afrohet golit me Osmanin, i cili pas një harkimi nga Gavazaj, godet me kokë, por jashtë. Gavazaj do të jetë protagonist edhe 5 minuta më vonë kur do të bëjë gjithçka vetë, por goditja e tij ndalet mjeshtërisht nga portieri mik. Në minutën e 24- t, tjetër mundësi për Skënderbeun, ku Gripshi godet traversën, ndërsa Gavazaj nga goditja e këndit pasardhëse gabon shënjestër. Hungarezët e Videotonit duken para portës korçare vetëm në minutën e 32- të, kur Mariç nga jashtë zone godet, por jo saktë. PJESA E DYTË- Gjithçka fillon me shumë ndryshime në formacion dhe ky fraksion loje për Skënderbeun është komplet ndryshe nga pjesa e parë. Bardhekuqtë janë totalisht në hije dhe u japin terren hungarezëve, që nuk falin. Në minutën e 59- të, pas një përgjumje të mbrojtjes korçare, Sepovics arrin të shënojë me një goditje pranë zonës. Goli i shënuar nga Videotoni duket se do të zgjonte Skënderbeun, por korçarët nuk e kanë forcën për të gjetur barazimin. Kështu që me humbje u mbyll edhe miqësorja e dytë e Skënderbeut në Slloveni.
SKËNDERBEU: