Partizani, dy sulmues në provë
Luis Kaçorri, 19-vjeçari mirditor, prurja e dytë që u përgatit dje me kryeqytetasit
Eenjtja ishte paralajmëruar si ditë prurjesh në kampin e kuq, pasi ishte thënë se përgjegjësi i merkatos së Partizanit do të sillte si fillim dy lojtarë të rinj. Realisht ashtu ka ndodhur në seancën e pasdites së djeshme, pasi nën urdhrat e trajnerit Sulejman Starova janë vënë edhe dy lojtarë të rinj. Fillimisht u mësua se të dy janë sulmues dhe që do të vëzhgoheshin nga stafi teknik. Drejtuesit e klubit preferuan që të mos i deklaronin emrat e lojtarëve, ndonëse ata u bënë pjesë e skuadrës në stërvitje. Shkak për këtë është bërë një urdhër i Luçiano Moxhit, i cili nuk dëshiron që lojtarët të cilët nuk kanë firmosur të bëhen pjesë e lajmeve mediatike. Duke ditur se priten shumë afrime lojtarësh për t'u provuar, shefi i merakos së kuqe, Luçiano Moxhi, dëshiron që emrat të mos bëhen publikë. Gjithsesi, "Panorama Sport" ka bërë të mundur që përveç fotove të lojtarëve të sigurojë edhe emrat. Bëhet fjalë për dy qendërsulmues, kroati Sandro Ugrina, si dhe 19vjeçari shqiptar Luis Kaçori, që jeton në Itali. Nga ajo që u pa gjatë seancës së djeshme, sulmuesi kroat ka lënë përshtypje të mirë te stafi teknik dhe ekipi. 19- vjeçari Luis Kaçorri vjen nga Italia, por me origjinë është nga Mirdita. Kaçorri luan si qendërsulmues
në ligat e ulëta në Itali, ku në sezonin e fundit ka qenë pjesë e skuadrës "Jolly & Montemurlo". Moxhi nuk ka dashur të publikohen emrat e dy lojtarëve, por nuk dihet nëse ata bëjnë pjesë te lista e lojtarëve që ai do të sjellë për Partizanin
KROATI- Sandro Ugrina në sezonin e fundit ka qenë pjesë e skuadrës kroate RNK Split, ku në pjesën e parë të kampionatit ka qenë shok skuadre me ish-sulmuesin e Partizanit, Elis Bakaj, i cili për mosshlyerjeje të pagave u rikthye në Shqipëri te Vllaznia.
Ugrina është i datëlindjes 10 gusht 1991 dhe karrierën e tij e ka zhvilluar vetëm në Kroaci me Inter Zapreshiç, Gorica, Cibalia dhe së fundmi me RNK Split. 25-vjeçari aktivizohet si "pykë", por statistikat e golave nuk i ka shumë të pasura, 10 gola në 6 sezone. Gjithsesi,
sulmuesi kroat ka lënë përshtypje të mirë në seancën e parë që ka zhvilluar me ekipin. Ugrina do të vëzhgohet nga stafi, ku me shumë mundësi ndeshja e sotme e kontrollit brenda grupit mund të vendosë shumë për të ardhmen e sulmuesit kroat me Partizanin.