Humor dhe keqardhje, ja 10 çuditë e klubit të Elbasanit
U dhanë vetëm gjysmat e rrogave, ikën jabanxhinjtë
Elbasani ra në pikën më të ulët në his torinë e vet futbollistike, teksa sezonin e ardhshëm do të luajë në Kategorinë e Dytë. "Panorama Sport" u bën një skaner 10 "çudive" që kanë shoqëruar këtë klub gjatë këtij sezoni. Duke nisur nga shitja e mbetur në "tentativë" e aksioneve, rënia nga kategoria pas hyrjes në garë si pretendentë për t'u ngjitur dhe lojtarë që përjashtohen sepse kërkojnë rrogat, janë disa prej paradokseve të një klubi që ka lënë gjurmë në historinë e futbollit shqiptar. Një klub ku ekipet e moshave do të militojnë në Superiore, ndërsa skuadra e parë në Kategorinë e Dytë. Një histori që nisi me shitjen e aksioneve rreth 1 milion euro një kompanie angleze dhe përfundoi me rënien e ekipit në nivelin e tretë të futbollit shqiptar. Ja dhjetë çuditë e Elbasanit që ndodhën në sezonin e kaluar.
- Në shtator të 2016- ës, klubi i Elbasanit nisi procedurat për shitjen e aksioneve te pronarë anglezë. Edhe sot e kësaj dite kur u mbyll kampionati, situata është e paqartë, ku nuk dihet se kush drejton. As kryetari i bashkisë, Qazim Sejdini, apo ish-presidenti Arben Laze nuk janë prononcuar për situatën që është krijuar në klub.
- Fillimisht kompania e huaj firmosi blerjen e aksioneve me emrin "Level Up Sa". Më pas, ajo firmosi sërish kontratën për blerjen e aksioneve me emrin "Mançester Group".
- Gjatë të gjithë kampionatit, lojtarët morën më pak sesa gjysmat e rrogave që u takonin. Një pjesë e tyre u dhanë nga "pronarët" e rinj.
-Pa u mbyllur mirë gjysma e kampionatit dhe kur ende nuk ishte hapur merkato e dimrit, Elbasani përzuri të gjithë jabanxhinjtë, pasi u konsideruan si organizatorë të bojkotit për shkak të rrogave.
- Të gjithë ata futbollistë që u larguan në mesin e sezonit nga verdheblutë arritën objektivat me skuadrat që mbyllën kampionatin, Elbasani jo.
-Verdheblutë hynë si pretendentët kryesorë për ngjitjen në Superiore, por në fund të edicionit ranë në Kategorinë e Dytë.
- Elbasani ka një nga dy stadiumet më modernë të vendit tonë, por me sa duket i rezultoi një "mallkim". Më fatlumët pas rënies së Elbasanit në të Dytën do të jenë skuadrat kundërshtare që do të vizitojnë këtë impiant. Për lojtarët e ekipeve kundërshtare do të jetë një mundësi për të shkrepur foto dhe ruajtur kujtime nga një prej stadiumeve më të mirë që ka Shqipëria.
-Edhe pse një nga qytetet më të mëdha në vend dhe me një tifozëri të madhe, Elbasani pati një nga mesataret më të ulëta të sportdashësve
në stadium. Paraqitjet e dobëta të skuadrës bënë që edhe tifozët të largoheshin.
-Të vetmen ndeshje që Elbasani e fitoi me dy gola diferencë sezonin që sapo lamë pas, ishte ndaj Turbinës ( 3- 1). Si për ironi të fatit, kjo ndeshje është vënë nën hetim nga Komisioni i Etikës dhe dyshohet si e trukuar.
- Ekipet e moshave, paratërinjtë dhe të rinjtë, do të luajnë dy kategori më lart sesa ekipi i parë. Moshat militojnë në Superiore, ekipi i parë në të Dytën.