Gati stadiumi, tapet nga Italia për Tomorin
Tomori do të rikthehet të luajë në stadiumin e vet në kampionatin e ardhshëm. Beratasit u detyruan të zhvendoseshin në Kuçovë gjatë pjesës së dytë të sezonit të kaluar, pasi tapeti i stadiumit "Tomori" ishte në gjendje skandaloze. Dhe menjëherë nisi puna për rikonstruksionin e stadiumit.
TAPETI - Kur kanë kaluar rreth tre muaj nga fillimi i punimeve për rikonstruksionin e stadiumit të Beratit, duket se gjithçka ka shkuar në rrugën e duhur. Aktualisht, kanë përfunduar të gjitha fazat e rikonstruksionit të fushës së stadiumit dhe ajo që ngelet tashmë është vetëm shtrimi i tapetit me bar artificial. Ky tapet pritet të vijë në javët në vazhdim nga Italia duke qenë i standardeve më të larta dhe sipas të gjitha kushteve të kërkuara nga FIFA dhe UEFA. Zgjedhja e një tapeti të tillë është bërë që të jetë në funksionimin edhe të ekipeve zinxhir, pasi stadiumi i vjetër ka shumë probleme dhe në kohë me reshje shiu është i papërshtatshëm për të zhvilluar një ndeshje futbolli. Ndërkaq, është bërë rikonstruksioni i ambienteve të jashtme të stadiumit dhe i atyre të brendshme. Stadiumi do të ketë një pamje të re nga jashtë, në një kohë që ishte në gjendje shumë të keqe. Gjithashtu, është ndërhyrë edhe në ambientet e brendshme të stadiumit për të krijuar kushte sa më të mira. Duket se ekipi do të rikthehet të luajë në një impiant me kushte shumë të mira në kampionatin e ardhshëm. Ajo që mbetet për t'u parë, është skuadra që do të ndërtohet për sezonin e ri. Një impiant modern dhe tapet i ri sigurisht që kërkojnë edhe një skuadër të denjë që të synojë rikthimin në Superiore. Tifozët e presin me padurim rikthimin e ekipit në elitë. Por, gjithçka varet nga drejtuesit që duhet të mendojnë të ndërtojnë një ekip cilësor. Pritet që në korrik të mësohet më shumë për të ardhmen e skuadrës. Eris Sylyku