Diego Kosta kris Konten me Çelsin
Edhe tekniku italian i pakënaqur me drejtuesit, i injorojnë listën e merkatos
Duket e pamundur, por në futboll, ako ma më shumë se në çdo fushë tjetër, koha vrapon për të shkartisur letrat dhe përmbysur ekuilibrat. Idhulli i Anglisë, falë fitores në Premier Ligë që në tentativën e parë dhe i lavdëruar nga tifozët dhe shtypi, Antonio Konte, është sot shumë i shqetësuar. Mes tij dhe Çelsit ka tension reciprok. Klubi nuk e ka pritur mirë mesazhin e famshëm që ai i ka dërguar Diego Kostës ku i kërkonte që të gjente skuadër, pasi nuk bënte pjesë më në planet e tij. Ndërsa, nga ana e tij, trajneri nuk është i kënaqur nga merkatoja që po bëjnë drejtuesit, e cila nuk i ka sjellë ende asnjë nga emrat që ai ka kërkuar për përforcimin e kampionëve, për të bërë një sezon si protagonistë edhe në Champions. Është ende herët për të përmendur fjalën divorc, por krisja e parë ka ndodhur.
MERKATO - Emri i fundit që tekniku italian kishte kërkuar, është ai i Lorenco Insinjes (i cili me siguri nuk do të largohet nga Napoli). Por, fakti që në merkaton e Çelsit nuk po lëviz asgjë, i ka lënë një shije të hidhur trajnerit. Skuadra është ende me pushime dhe do të nisë përgatitjet për sezonin e ri më 5 korrik në qendrën stërvitore "Cobham". Kampionati rinis më 12 gusht, por në zyrat
e klubit fjala merkato është ende një tabu. Dëshirat e italianit janë deri tani ato që vijnë nga ish-skuadra e tij, Juventusi: Leonardo Bonuçi dhe Aleks Sandro. Marko Verrati dhe së fundmi edhe Insinje. Dyshimi se marrëdhëniet mes klubit dhe teknikut janë ngrirë është
shumë i madh pas çështjes "Diego Kosta". Konte e ka dërguar atë SMS pa marrë më parë miratimin e bordit dhe këtë e dëshmon reagimi i drejtuesve, për të cilët Kosta deklaroi se të ardhmen e tij do ta vendosnin vetëm ata dhe kur të kishte një vendim do t'ia bënin me
dije. "Unë jam ende në pritje të vendimit të klubit. Ata më kanë thënë të mos marr asnjë hap", tha sulmuesi pas ndeshjes kualifikuese me Maqedoninë, duke injoruar totalisht mesazhin e trajnerit, pasi ka edhe dy vite kontratë në "Stamford Bridge".