Bella refuzon ofertat: Qëndroj sërish te Tomori

Tomori vijon pushimet që prej përfundimit të kampionatit, ndërkohë që pjesa më e madhe e futbollistëve kanë filluar të frekuentojnë bregdetin në këto ditë mjaft të nxehta. Në kampin beratas gjithçka ngelet pezull për sa i përket riorganizimit dhe merkatos, ku gjithçka pritet të fillojë në ditët e para të muajit korrik. Sipas informacioneve paraprake, mësohet se do të ndërtohet një grup, i cili pritet të konkurrojë denjësisht në garën për të qenë pjesë e 3 ekipeve më të mira, duke mos përjashtuar në këtë mënyrë objektivin e shumëpritur, Superioren. Ndërkaq, pjesa më e madhe e futbollistëve kanë marrë edhe ofertat e para nga skuadra të ndryshme të kampionatit tonë, të cilat janë duke i studiuar ato me kujdesin më të madh. Aldo Bella është një prej futbollistëve me disa oferta në drejtim të tij, mirëpo 30-vjeçari duket se ka përjetuar një aventurë të lumtur me Tomorin dhe dëshiron sërish që të jetë pjesë e kësaj skuadre. Tashmë, gjithçka pritet të ngelet në dorën e drejtuesve, pasi do të jenë ata ideatorët e Tomorit për sezonin e ardhshëm. Në një prononcim për "Panorama Sport", futbollisti Bella u shpreh: "Këtu kam kaluar momente të bukura, të cilat dua t'i përjetoj sërish. Jam tepër i kënaqur nga korrektësia e drejtuesve, pasi më kanë mbështetur maksimalisht në çdo aspekt të mundshëm. Grupi kishte në përbërje futbollistë shumë të mirë, paçka jemi të vetëdijshëm që duhet të kishim treguar shumë më shumë se aq. Kam dy oferta serioze deri në këto momente, por nuk do të bëjë asnjë hap pa biseduar në fillim me drejtuesit e Tomorit. Dëshira është që të luajë përsëri për skuadrën beratase, mirëpo gjithçka ngelet në dorën e tyre. Jam në pritje të thirrjes së tyre", përfundoi Bella. Eris Sylyku