Martoreli: Familja e Donarumës, fajtore dhe e pabesë

Flet menaxheri i parë i portierit: Nuk habitem që Xhanluixhi nuk do të rinovojë në Milano

Çështja "Donaruma" po trondit jo pak persona, madje ka nervozuar edhe disa të tjerë, mes të cilëve është edhe Xhokondo Martoreli, menaxheri i parë i Xhanluixhit. Në një intervistë për "TMW Radio", ai nënvizon se jo vetëm Raiola, por pas këtij refuzimi që ai nuk ngurron ta quajë aspak sportiv, fshihen sidomos familjarët e futbollistit. "Ndoshta do të dukem antipatik, por unë jam ndër të paktit që e parashikova këtë skenar, prandaj nuk më duket një surprizë fakti që Donaruma nuk pranon të rinovojë me Milanin. Ky është një problem që duhej të parashikohej që në fillim, për të kuptuar se cili është përgjegjësi kryesor, sepse kur çështja ka arritur deri këtu, në vitin e fundit të kontratës, panorama aktuale është e vështirë që të ndryshojë, - nënvizon Martoreli. - I njoh të gjithë, familjen, të afërmit, çdo cep të shtëpisë Donaruma. Habitem që ka shumë organe mediatike që janë në dijeni të kësaj që unë po them, por e injorojnë në mënyrë absurde. Historia e Donarumës është shumë e ngatërruar dhe ky është rezultati final i shumë sjelljeve aspak korrekte që në fillimet e karrierës së tij. Që do të thotë? Të them që e zbulova unë është antipatike. Ishte 10 vjeç dhe jam i sigurt që edhe një i verbër do t'i kishte kuptuar cilësitë e tij. Një natë, pashë një djalë të ri, teksa priste topat dhe telefonova menjëherë Auzilion e Interit. Nga ajo natë dhe për tri vite me radhë, deri në 2013-ën, nisi një marrëdhënie e ngushtë me Interin, skuadër me të cilën bëri disa prova, një histori e gjatë, derisa një pasdite, unë me babanë dhe të ëmën e tij gjetën akordin pas 4 viteve pune së bashku. Ndërkohë, ditën tjetër, pas firmës me Interin dhe pasi ishim kthyer në Napolin, ata të dy (babai dhe e ëma), morën sërish avionin për në Milano dhe firmosën me Milanin, duke e quajtur të pavlefshme marrëveshjen time me Interin. Prandaj, ky gjest i pabesë nga ana e tyre duket se po përsëritet sërish. Sa mund të ndikojë 1 milion euro diferencë për një 18vjeçar? Kur mendoj se ka njerëz që shkojnë çdo ditë në punë dhe më dëgjojmë mua të them se 1 milion euro nuk janë diçka e bukur, ndoshta shumë do më urrejnë. Por në kontekstin e një 18-vjeçari që nuk kënaqet me 5 milionë në klubin që i dha besim, por kërkon 6 milionë euro në vit, për një futbollist, diçka e tillë nuk është diçka që mund të të ndryshojë jetën. Fundja, pas 5 viteve me Milanin do të ishte 23 vjeç dhe do të kishte sërish të gjithë karrierën përpara...".