Partizani dhe Tirana duan fat, Skënderbeu e ka... “autostradë”
Të kuqtë dhe bardheblutë rrezikojnë klube "big"
Skënderbeu niset si fa vorit për të kaluar turin e parë të Ligës së Europës, ndërsa Partizani dhe Tirana shpresojnë te një "mrekulli" në gogla, që mund t'ju rezervojë ekipe të kalueshme nga 49 të mundshmet që janë në vazon e parë. Mjafton të shikosh skuadrat (nga vazo 2) që mund të jenë kundërshtar të korçarëve, për të kuptuar se bardhekuqtë mund ta kenë thjesht një shëtitje turin e parë. Suksesi i viteve të kaluara në Europë i bardhekuqve (kualifikimi në fazën në grupe të Ligës së Europës), ka bërë që koeficienti i tyre të jetë 6.825. Kësisoj, skuadra e Ilir Dajës është në grupin e skuadrave që cilësohen favorite dhe janë në vazon 1. Madje, nga ky koeficient i lartë, vetëm në vazon e parë Skënderbeu lë pas 35 klube në Europë që e nisin nga turi i parë paraeliminator. Korçarët kanë shanse të "peshkojnë" skuadra të dorës së dytë, ku shumica e tyre janë të nivelit amator. Bëhet fjalë për ekipe që përfaqësojnë në këtë kompeticion shtete si Gjibraltari, San Marino, Andorra, Malta, Ishujt Faroe, Luksemburg etj., që janë në vazon e dytë, aty ku ndodhet edhe Partizani me Tiranën. "Çfarë preferenca mund të kesh në këtë vazo, në një kohë që shumicën e skuadrave as nuk i njohim fare, pasi janë të shteteve të pazhvilluara në futboll", i thanë dje gazetës "Panorama Sport" burime zyrtare në klubin korçar, duke mos lënë pas batutat. Megjithatë, meraku i Skënderbeut është largësia. Bardhekuqtë shpresojnë që të kenë si kundërshtar një skuadër jo shumë kilometra larg Shqipërisë. Vende si Kazakistani, teksa ky shtet përfaqësohet nga Irtysh Pavlodar apo edhe Gjeorgji, nuk preferohen nga drejtuesit dhe trajneri Ilir Daja. PARTIZANI
DHE TIRANA
Makabi Tel Aviv në Izrael, Leh Poznan në Poloni, Cervena Zvezda në Serbi, por jo vetëm. Klube me buxhete që kalojnë 10 milionë eurot mund të jenë rivalë të mundshëm të Partizanit dhe Tiranës në turin e parë paraeliminator të Ligës së Europës. Shorti që do të hidhet sot duhet të jetë me shumë fat për klubet legjendë të futbollit shqiptar, që rivalët do t'i kenë nga vazo 1. Dy klubet që përfaqësojnë
kryeqytetin ndodhen në vazon 2, me të kuqtë që, pavarësisht suksesit në sezonin e kaluar, nuk e arritën dot koeficientin që i mundësonte vazo 1, duke iu bashkuar Skënderbeut. Ndërsa bardheblutë rikthehen në Europë pas pesë vitesh dhe normalisht koeficienti i tyre është shumë i vogël në krahasim me korçarët dhe rivalët historikë të Partizanit. E
veçanta është se bardheblutë dhe Vaduzi janë të vetmet skuadra në Ligën e Europës që militojnë në këtë kompeticion duke qenë në nivelet e dyta të kategorive të futbollit në shtetet përkatëse. Tirana zbriti për herë të parë nga Superiorja këtë sezon, ndërsa Vaduzi, që merr pjesë në Ligën e Europës si fitues i Kupës së Lihtenshtejnit, militon në Ligën e Dytë zvicerane.