Pompa dhe ulërima në stërvitje, Ze Maria rivlerëson lojtarët
Lojtarët në "sitë", sot nis edhe grumbullimi
Nëse dita e parë më shumë shërbeu për të njohur grupin, e dyta nisi me ulërime dhe dënime. Ze Maria merr zyrtarisht "timonin" e Tiranës dhe për të kuptuar këtë mjaftonte që të shihje përgatitjet dhe formën se si braziliani e trajtoi seancën e djeshme. Gjithçka nisi me vrapime rreth fushës dhe kaloi tek ushtrimet. Dhe çfarë ushtrimesh në fakt, pasi pikërisht në këto çaste lojtarët nisën që t'i dëgjonin volumin e zërit trajnerit. Për të arritur perfeksionin dhe zhdërvjelltësinë në aksion, 43-vjeçari aplikoi disa kombinime në pasime, por vetëm me një prekje. Kush gabonte, gjente rezistencën e ishlojtarit të Interit. "Thashë vetëm me një prekje, jo dy", dëgjohej në sfond Ze Maria. Për të matur rezistencën e gjithsecilit, ai vendosi në praktikë edhe pompat të kombinuara me ushtime. Ze Maria, së bashku me stafin e tij, po përpiqen të kuptojnë cilësitë e elementëve që kanë në organikë dhe për të mësuar diçka më tepër u ndihmuan prej dyshes Egbo-Gvozdenoviç. Ky i fundit madje në një moment nisi që t'i tregonte ndihmëstrajnerit Marko Aurelios një e më një lojtarët. Këtë gjë tekniku po e bën për një qëllim të qartë, pasi po rivlerëson grupin. Çdo emër do të kalojë në "sitë", pra këto ditë përgatitjesh do i shërbejnë atij që të kuptojë vlerën që secili ka dhe këtu përfshihen edhe ata që ndoshta deri dje mund të cilësoheshin të pazëvendësueshëm. Fakti që Tirana do të luajë në Kategorinë e Parë, nuk do të zbehë kërkesën e llogarisë, përkundrazi për t'u ngjitur duhet përkushtim dhe rrjedhimisht rezultate. Kjo është një provë edhe për vetë Ze Marian, pasi në Shqipëri erdhi pikërisht për t'u afirmuar. Sakaq, trajneri ka kërkuar edhe grumbullim. Në mungesë të një faze përgatitore jashtë vendit, ekipi do të "ngujohet" në një prej hoteleve të kryeqytetit. Regjim strikt dhe përgatitje intensive do të ketë deri në ditën e ndeshjes së parë.