Merkato në Serinë A, shqiptarët në... modë
Benevento sulm për Memushajn, por e do Lila dhe Sioni
Futbollistët e Kombëtares shqiptare janë në modë në kampionatin italian dhe mund të bëhen protagonistë në merkaton e verës. Ledian Memushaj, Berat Gjimshiti dhe Arlind Ajeti kanë tërhequr vëmendjen e disa skuadrave të ndryshme. Për momentin janë vetëm thashetheme, ndërsa në ditët në vijim këto ekipe do të kërkojnë informacione mbi mundësinë e transferimit të tyre.
BENEVENTO - Pas Bolonjës, e cila ka qenë skuadra e parë që ka shprehur dëshirën për të transferuar kapitenin e Peskarës Ledian Memushaj, është shtuar në garë edhe Benevento. Ekipi që u ngjit për herë të parë në elitën e futbollit italian kërkon t'i besojë eksperiencës së mesfushorit vlonjat, i cili këtë sezon ishte një nga më të mirët e Peskarës, pavarësisht se këta të fundit ranë në Serinë B. Me shumë mundësi, Memushaj pritet të jetë sërish pjesë e Serisë A për sezonin e ardhshëm, sepse do të jetë përforcimi i parë i Beneventos sipas portalit të njohur "tuttomercatoweb".
LILA DHE SIONI - Një pistë e re për të ardhmen e Ledian Memushajt është Sioni i Paolo Tramexanit. Ditën e djeshme, mediat italiane raportuan lajmin se
drejtuesit e skuadrës zvicerane kanë kërkuar informacione në lidhje me rrogën vjetore që ka mesfushori vlonjat te Peskara. Ndërkohë, një tjetër ekip që ka shfaqur interes për kapitenin e Peskarës është Lila në Francë, skuadër që drejtohet nga Marselo Bielsa.
DYSHJA E MBROJTJES - Berat Gjimshiti dhe Arlind Ajeti janë dy objektivat kryesorë të skuadrës së Krotones. Ekipi që bëri mrekullinë dhe mbijetoi në javën e fundit të kampionatit italian kërkon dy shqiptarët për sezonin e ardhshëm. Ajeti nuk ka asnjë shans të qëndrojë te Torino, ndërsa Gjimshiti ka
përfunduar huazimin tek Avelino dhe Atalanta duhet t'i gjejë një tjetër skuadër. Krotone po studion me kujdes situatën e tyre dhe dëshiron t'i transferojë duke përfituar nga fakti që të dy lojtarët e njohin njëritjetrin edhe në Kombëtare dhe mund të përshtateshin më së miri në ekipin italian.