Çështja Kaliniç, Fiorentina refuzon shkëmbimin me Bakën
Pas transferimit të Andre Silvës për 38 milionë euro, Milani kërkon me ngulm edhe një sulmues tjetër. Pavarësisht se në radarët kuqezi kanë përfunduar shumë bombera anembanë Europës, ditët e fundit drejtuesit kuqezi janë përqendruar te Nikola Kaliniç. Kroati, i cili në dy vitet e tij në Itali ka shënuar thuajse 1 gol në çdo dy ndeshje që ka zbritur në fushë me Fiorentinën, vlerësohet nga klubi i tij 30 milionë euro. Fjala "ulje" nuk ekziston në fjalorin e familjes Della Vale që zotëron skuadrën toskane pavarësisht se drejtuesit kuqezi kanë ofruar deri në 25 milionë euro për sulmuesin në fjalë. Në bisedën e fundit mes palëve, drejtori sportiv Maks Mirabeli u propozoi vjollcave 23 milionë euro plus kartonin e Xhanluka Lapadulës, i cili në tregun e futbollistëve ka një vlerë prej 6 milionë eurosh. Në Firence duan vetëm para dhe nuk pranojnë asnjë alternativë teksa "Djalli" nuk dëshiron të paguajë të gjithë shumën e kartonit të 29-vjeçarit. Mediat italiane flasin për një këmbëngulje nga trajneri Montela për futbollistin ndaj nga "Casa Milan" është propozuar një shkëmbim "kokë më kokë" me Karlos Bakën plus 11 milionë euro, por oferta ka marrë një tjetër "jo" si përgjigje. Stefano Pioli, trajneri i Fiores, do ta priste krahëhapur kolumbianin, por me sa duket krerët e tij kanë një tjetër plan dhe do të pranojnë vetëm oferta ku shuma për Kaliniç do të paguhet e plot. Milani, që në këtë merkato nuk ka marrë asnjë përgjigje negative për lojtarët që ka dashur, pritet të bëjë lëvizjen e radhës, me kroatin që e ka pranuar kalimin te kuqezinjtë, madje ka rënë dakord edhe për pagesën, e cila do të jetë 2.5 milionë euro në katër sezonet e ardhshme.