Shqipëria, spektakël kundër Azerbajxhanit
Husaj, sërish "MVP-ja i kombëtares, 21 pikë të realizuara
Përmbysja e çmendur ndaj Suedisë në ndeshjen e parë në Grupin A të Ligës së Europës nuk ishte rastësi për kuqezinjtë e volejbollit. Kombëtarja e meshkujve ka marrë një tjetër fitore spektakolare në Shkup të Maqedonisë në fundin e fazës së parë duke mposhtur kësaj here Azerbajxhanin në shifrat e përgjithshme 3- 1. Një performancë fantastike kjo e djeshmja e djemve kuqezinj, që e dominuan ndeshjen në shumicën e kohës, duke mos i dhënë asnjë shans për të fituar skuadrës azere. Triumf ky që mban ende në garë Shqipërinë për t'u kualifikuar për në "Final Four". Shqipëria u tregon "muskujt" azerëve që në fillimin e setit të parë ku ka ndeshjen në kontroll (7-3, 8-5, 12-10). Kuqezinjtë janë vazhdimisht në kryesim. Edhe këtë pasdite në Shkup Husaj është lideri i kombëtares, deciziv jo vetëm në sulm, por edhe në mbrojtje. I pathyeshëm shfaqet edhe shtatlarti tjetër Bashi në shërbimet e tij. Barazimi i vetëm në këtë set vjen nga azerët në 22-22. Por përgjigjja e tanëve ka qenë "flash". Përvoja e legjionarit Enea Xhelati bën diferencën në parket. Tri pikë radhazi të shënuara nga titullari (dy prej tyre 'silura' nga shërbimi) mbyllin llogaritë e setit të parë në favor të Shqipërisë në shifrat 25-22. Seti i dytë është më dramatik me azerët që ruajnë një kryesim të përkohshëm 13-11, 17-12. Në këtë moment del në skenë kapiteni Husaj me klasin e tij, që shënon duke rikuperuar në 17-15. Efikas në çdo pozicion në sulmet e tij dhe Shqipëria është vetëm -1 pikë (19-18). Një bllok i Xhelatit vendos gjithçka në ekuilibër 19-19. Në fundin e setit Husaj është lideri duke kaluar skuadrën në avantazh 20-19 nga vija e dytë, për më tepër sakrifikon edhe me dorën e majtë. Kuqezinjtë tashmë kanë qetësinë dhe udhëheqin 22-19 falë efikasitetit në lojën në bllok me Bashin protagonist. Njëherësh Husaj nuk heq dorë nga specialiteti i rij i shërbimeve të forta. Një shërbim i humbur nga azerët dhe "set point" për tanët. Azerët
shtyjnë festën e shqiptarëve ( 22- 24) dhe tekniku Melka kërkon një pushim të detyruar. Organizatori Deliu shërben për Husajn dhe numri 8 fluturon nga vija e dytë duke mbyllur gjithçka me një "fotokopje" të setit të parë 25-22.
SETI I TRETË- Euforia e avantazhit të dy seteve të para jep efekte në rendimentin e Shqipërisë. Me gjithë finalizimet e Koçit apo bllokun e Kulës (një nga momentet pikante të këtij fillim-seti) azerët përfitojnë nga një përgjumje e kuqezinjve duke
udhëhequr në +5 pikë (12-7). Organizatori i Farka Volej, Deliu, i lë vendin atij të Partizanit, Çalit. Azerët janë më superiorë në parket, ndërsa tekniku Melka në "time out"-et e kërkuara prej tij e vë theksin tek organizimi. Kampioni Anton Qafarena jep sinjale inkurajimi pas pushimit të dytë teknik me disa pikë radhazi, por kjo nuk mjafton në kthesën e kuqezinjve. Kështu azerët e fitojnë setin e tretë 25-17.
SETI I KATËRT- Por vetëm kaq për rivalët tanë. Kuqezinjtë shuajnë çdo iluzion
të azerëve për ndonjë mrekulli duke u rikthyer në setin e katërt fenomenalë. Ky set do të rezultojë një dominim total i volejbollistëve tanë. Kompaktësia reflektohet që në start ku skuadra shqiptare udhëheq 6-3, kjo falë potencialit të Koçit. Të besuarit e teknikut Melka diktojnë ndaj kundërshtarit duke e nxjerrë totalisht "jashtë loje" 13-5, 157, 16- 8 me të zakonshmin Husaj vrullin e Koçit nga vija e dytë, por edhe për meritë të mbrojtjes. Shqipëria thellon rezultatin 18-9 dhe ndeshja
nuk ka më histori pasi flet vetëm shqip. Deliu është produktiv jo vetëm në organizim, por edhe me shërbimet fatale duke e katapultuar Shqipërinë në 22-9. Fundi i eliminatores pasurohet edhe më shumë nga spektakli kuqezi me bllokun e Koçit, ndërsa veton e dha Baruti në qendër në fitoren me rezultatin e thellë 25- 10 dhe gjithë takimin 3- 1. Ndeshjet e kthimit të kualifikuesve të Ligës së Europës rikthehen në datat 23- 25 qershor në Parkun Olimpik.