Bushiç rinovon në Vlorë, Abazajn e duan në Holandë
Zbardhet lista, ikin Halilaj, Neziraj, Leal, Shehaj dhe Kuqi
Prej ditësh te skuadra e Flamurtarit flitej për një listë të trajnerit Duro me lojtarët që nuk ishin më në planet e tij. "Panorama Sport" ka arritur të zbulojë edhe dëshirat e trajnerit, ndërsa konfirmohet se 80 për qind e ekipit që mbylli sezonin do të largohet. Vetëm 6 lojtarë që mbyllën në Vlorë sezonin e shkuar janë në planet e trajnerit Duro dhe që do të qëndrojnë te Flamurtari, që janë tre mbrojtës, një mesfushor dhe dy sulmues. Më konkretisht, futbollistët që do të vijojnë të jenë pjesë e kuqezinjve për edicionin e ardhshëm janë: mbrojtësit Franc Veliu, Ivan Jakovljeviç dhe Ergis Mersini. Nga mesfushorët do të qëndrojë vetëm Alesio Hyseni, ndërsa nga sulmuesit qëndrojnë vetëm Danilo Alvesh dhe Tomislav Bushiç. Vetëm me këta lojtarë klubi do të vijojë bashkëpunimin dhe pritet që t'i thërrasë për t'u komunikuar këtë vendim në ditët në vazhdim. Ndërkohë nuk dihet se çfarë do të ndodhë në lidhje me Alveshin, pasi ky i fundit pretendon se i ka skaduar kontrata.
LARGIMET
Të shumta janë largimet e lojtarëve të Flamurtarit. Serbët Milos Rniç dhe Nikola Djuriç, kroati Ivan Galiç dhe malazezi Balsa Radoviç nuk bëjnë më pjesë në Flamurtarin e ri. Po ashtu pjesë e largimeve janë edhe brazilianët Mauricio Leal, si dhe Nakamuta Lineker. Gjithashtu në planet e trajnerit Duro nuk janë edhe Ilir Berisha e Haxhi Neziraj. Të bie në sy që pas shumë vitesh pjesë e Flamurtarit nuk do të jenë lojtarët vlonjatë Taulant Kuqi dhe Ardit Shehaj, të cilët nuk janë përfshirë në listë. Listës së largimeve u shtohen edhe dy portierët Argent Halilaj dhe Stivi Frashëri, pas ardhjes së portierit Adis Nurkoviç. Pritet që Duro të marrë edhe dy portierët e ekipeve të moshave, një prej tyre Pano Qirko, për t'i pasur si rezervë. Lojtarëve të larguar u shtohen edhe ata që zgjodhën ekipe të tjera, si Bruno Telushi, Donjet Shkodra dhe Astrit Fazlliu.
BUSHIÇ
Trajneri Shpëtim Duro ka kërkuar me ngulm që në ekipin e ri të projektuar prej tij të ketë sulmuesin Tomislav Bushiç. Në këto kushte, burime të sigurta të "Panorama Sport" konfirmojnë se drejtuesit e Flamurtarit kanë mbajtur një raport shumë të afërt për ta mbajtur lojtarin. Por mësohet se Bushiç ka refuzuar një ofertë shumë joshëse të Skënderbeut. Drejtuesit e Flamurtarit, nga ana tjetër, e kanë joshur Bushiçin duke i premtuar 30% të kontratës në dorë. Kjo ka qenë një tjetër shtysë që ka bërë që lojtari të qëndrojë në Vlorë. Burime të sigurta në klub tregojnë se kroati ka arritur një marrëveshje për rinovimin e kontratës me një vit dhe opsion rinovimi për një tjetër sezon.