30-vjetori, ja sekretet dhe rekordet e Mesit
“Alieni” mahniti botën, golashënuesi më i mirë në Spanjë
Më 24 qershor të vitit 1987, në Rozario të Argjentinës lindi një fëmijë, i cili ishte i destinuar për të ndry shuar njëherë e përgjithmonë historinë e futbollit: Lionel Mesi. "Pleshti" festoi ditën e djeshme 30-vjetorin e lindjes. Në një karrierë të jashtëzakonshme, duke shënuar mbi 500 gola në 13 vite futboll dhe duke thyer rekorde të njëpasnjëshme. U transferua te Barcelona me hijet e dyshimit dhe me problemet e rritjes së tij. Gjithçka u harrua kur gjeniu i futbollit zbriti në fushën e lojës dhe theu shumë rekorde. Me pasionin e tij, talentin e lindur dhe punën e palodhur arriti të shndërrohet në një legjendë futbolli. E quajnë jashtëtokësori, sepse është shumë larg niveleve të lojtarëve të tjerë dhe theu thuajse çdo rekord në këtë sport. Le t'i nisim me radhë dhe ta nisim nga ajo që Mesi di të bëjë më mirë: golat. Argjentinasi arriti të shënonte 349 gola në kampionatin spanjoll, duke u bërë golashënuesi më i mirë i historisë, që mbahej për vite me radhë nga sulmuesi i Atletikos së
Bilbaos, Telmo Zara. Argjentinasi është gjithashtu shënuesi më i mirë i historisë së Barcelonës, pasi ka parakaluar Sezar Rodriguezin, i cili është ndalur në kuotën e
232 golave. Ndërkohë, Mesi ka arritur të shënojë 507 me fanellën katalanase. Në kombëtaren e Argjentinës nuk ka histori. Ai ka arritur të thyejë një sulmues të madh si Gabriel Batistuta. "Batigol" u ndal në kuotën e 54 golave, ndërsa Mesi ka shënuar 58 deri tani dhe ka ende shumë vite për të luajtur.
REKORDET - Por nuk përfundon këtu. Do të ishte shumë e thjeshtë. Për t'u futur në librat e artë të historisë, Leo Mesi në vitin
2012- 2013 u bë lojtari që shënoi më shumë gola në një sezon të vetëm futbollistik.
Plot 73 të tillë, duke thyer rekordin e Gerd Mylerit, i cili kishte shënuar 67. Mesi arriti të dërgonte topin në rrjetë 73 herë në 60 ndeshje të luajtura. Madje, ai është golashënuesi më i mirë në një vit kalendarik me 91 gola.
Nuk ka dy pa tre dhe Mesi i ka thyer Mylerit një tjetër rekord të rëndësishëm. Ai ka shënuar 21 gola radhazi në kampionat, ndërkohë që gjermani është ndalur në 16.
Numra që tregojnë vetëm madhështinë e një futbollisti që është i heshtur dhe flet vetëm në fushën e lojës. Rivaliteti në distancë me
Ronaldon e ka bërë akoma më të fortë. Argjentinasi është golashënuesi më i mirë në historinë e klasikeve mes Barcelonës dhe Realit, duke shkuar në 23 gola, por edhe në derbin katalanas (17 gola). Është lojtari më fitues në historinë e klubit me 30 tituj që nga koha e Rajkardit, pastaj me Guardiolën dhe Enriken. Për momentin është lojtari që ka në palmaresin e tij personal 5 "Topa të Artë", edhe pse Ronaldo është shumë pranë për ta barazuar. Gëzuar ditëlindjen, Lionel Mesi, me shpresën që do të vazhdosh ende të na mrekullosh. Një botëror me Argjentinën do ta bënte karrierën e tij nga më të bukurat e historisë së futbollit. Shanset për të triumfuar janë reale.