Ceremonia , italiani merr "Kalorës i Urdhrit të Skënderbeut"

Italiani largohet me nderimit më të lartë nga Presidenti

FSHF-ja ka organizuar dje një ceremoni lamtumire për ish-trajnerin e Kombëtares shqiptare, Xhani De Biazi, i cili dha dorëheqjen nga drejtimi i kuqezinjve pas 5 viteve e gjysmë. E organizuar në Tiranë, në katin e 23-të të njërës prej ndërtesave më të larta në kryeqytet dhe që ka zgjatur fiks 45 minuta, ceremonia e fundit e De Biazit si trajner i Kombëtares shqiptare, organizuar nga FSHF-ja, ka shërbyer edhe për t'i dhënë dhuratat dhe nderimet e fundit italianit në vendin tonë.

Kërkesa e FSHF-së - Në fjalën e tij përshëndetëse, Armand Duka ka bërë me dije se Komiteti Ekzekutiv në FSHF do të propozojë në Asamblenë e Ardhshme që De Biazi të bëhet anëtar nderi i Federatës.

Nderimi - Dje, në ceremoni, një nga përfaqësuesit e Presidentit të Republikës i ka dhënë italianit urdhrin më të lartë në vendin tonë: "Kalorës i Urdhrit të Skënderbeut". Një dekret që mban firmën e Presidentit Bujar Nishani dhënë për kontributin që De Biazi ka dhënë në futbollin shqiptar dhe arritjet në drejtimin e Kombëtares kuqezi. Gjatë ceremonisë mbajtën nga një fjalë të shkurtër edhe ambasadori italian në Shqipëri, Alberto Kutilio, si dhe futbollisti i Kombëtares Andi Lila. "Faleminderit Xhani për përfaqësimin që i ke bërë Italisë. Shpresoj që në tetor kundër Italisë Shqipëria të mos tregohet shumë e keqe me ne", u shpreh ndër të tjera ambasadori i Italisë në vendin tonë. Në fund, trajneri De Biazi lexoi një letër përmbledhëse dhe falënderuese për aventurën e tij me Kombëtaren shqiptare, ku ka theksuar veç falënderimeve dhe përshkrimit të udhëtimit, edhe faktin që në të ardhmen mund të ketë sërish kryqëzim të rrugëve të karrierës së tij me Kombëtaren shqiptare.