"Luftë" për shpërblimin, klubi duhet të kthejë paratë

Vendimi i Komisionit të Etikës pranë FSHF-së hap diskutimin se kush është zyrtarisht skuadra kampione e sezonit 2015-2016. I sigurt është tashmë vetëm fakti që ai kampionat nuk do t'i njihet Skënderbeut, që nga shtatë tituj kampionë, tashmë shkon në gjashtë. Mirëpo, klubi i Partizanit, që nga momenti kur Skënderbeu u dënua nga UEFA dhe të kuqtë zunë vendin e korçarëve në Ligën e Kampioneve, kërkon që t'i njihet titulli kampion në edicionin në fjalë, nisur edhe nga fakti se u rendit në vendin e dytë. Megjithatë, vendimi i Etikës specifikon vetëm që Skënderbeut i është hequr titulli kampion, por jo nëse ai i shkon Partizanit apo nëse do të mbetet vakant. Burime në federatë tregojnë për "Panorama Sport" se Komisioni i Etikës nuk e ka një kompetencë të tillë, ndaj duhet që organet disiplinore të FSHF-së të mblidhen për një vendimmarrje në bazë të masave të saposhpallura. Vetëm këto organe brenda institucionit të futbollit do të përcaktojnë nëse titulli do të cilësohet vakant apo nëse Partizani do të thyejë mallkimin disavjeçar për të qenë ai kampioni, ndonëse duke e siguruar atë në tavolinë. Më parë duhet pritur nëse Skënderbeu do ta apelojë vendimin dhe çfarë do të vendosë apeli i FIFA-s. Sidoqoftë, të kuqtë kanë bërë të qartë se në rast dënimi të Skënderbeut, do të kërkojnë nga FSHF premion prej 260 mijë eurosh që u jepet nga UEFA të gjitha skuadrave kampione që nuk arrijnë në fazën në grupe të Champions-it. Gjithashtu, klubit të kuq i lind e drejta që kërkojë edhe premion prej 100 milionë lekësh të vjetër, që FSHF ka dhënë për Skënderbeun si kampion të atij sezoni. Në nenin 16 të Kodit të Disiplinës Sportive përcaktohet qartë: Klubi, të cilit i kërkohet ose i urdhërohet kthimi i trofeve, duhet të kthejë mbrapsht të gjitha përfitimet e marra, veçanërisht shumat e parave të përfituara, si dhe objektet simbolike (medalje, kupa, etj.)".