Lushnja “pazar” në Berat, Bitri drejt zyrtarizimit

Në ditët e fundit të qershorit pritet të mësohet sesi do të jetë Lushnja e sezonit 2017- 2018. Verdhejeshilët, edhe pse do të luajnë në Kategorinë Superiore, mbeten në varësi të Bashkisë. Kështu që do të jetë kryebashkiaku Fatos Tushe, njëherësh president i klubit, së bashku me nënkryetarin e këtij institucioni, Gentian Nushi, që është edhe kryetari i Bordit Mbikëqyrës, që do të vendosin për Lushnjën e edicionit të ri. Në pritje të zbardhjes së planit, lojtarët vazhdojnë pushime, ndërsa mendohet që stërvitjen do ta nisin të hënën e 3 korrikut. Lushnjarët synojnë të ruajnë pjesën dërrmuese të grupit që mbylli kampionatin e fundit dhe të përforcohen me disa afrime cilësore.

Bitri - Një nga futbollistët e kontaktuar nga klubi lushnjar është edhe futbollisti beratas Enea Bitri. Mbrojtësi i Tomorit, që këtë verë do të mbushë 21 vjeç, pohoi faktin se është kontaktuar nga Lushnja dhe ka rënë dakord për të luajtur me verdhejeshilët. "Unë kam marrë kontakt nga drejtuesit e Lushnjës që më kanë bërë ofertën e tyre. Kemi rënë paraprakisht dakord me çfarë kemi biseduar. Gjithçka do të marrë formë zyrtare në momen- tin kur të jem në Lushnjë për të nisur përgatitjet. Kam luajtur vetëm për Tomorin, por nuk kam asnjë pengesë për të kaluar te Lushnja", deklaroi mbrojtësi. Drejtuesit e Lushnjës kanë kontaktuar edhe me Kaloshin. Portieri lushnjar mbylli sezonin te Tomori, por nuk ka përjashtuar mundësinë e rikthimit në Lushnjë. Ndërkaq, është menduar që skuadrës t'i bashkohen edhe portieri Bejte, elbasanasit Gava dhe Hyshmeri, fieraku Meto. Drejtuesit e Lushnjës mendojnë të rikthejnë pas një kohe të gjatë edhe lushnjarin Pepa. Megjithatë, momentalisht gjithçka është në kuadrin e dëshirave, pasi realizimi i afrimeve do të mësohet kur skuadra të zbresë në fushë.