Vjen edhe Uellsion, sot test brenda... grupit
Uellsion Luis de Oliveira "zbarkon" në tokën shqiptare. Mbrojtësi brazilian ka mbërritur gjatë paradites në Rinas dhe menjëherë i është bashkuar Tiranës në grumbullim. Pas disa orëve qetësi, është parë e udhës që ai të nisë edhe stërvitjen gjatë pasdites, pasi në mëngjes nuk e arriti. Lojtari në fjalë ka marrë konfirmimin nga UEFA për të luajtur, ndaj pritet që Ze Maria ta ketë në dispozicion kundër Makabi tel Aviv. Shanset që ai të jetë në formacion janë të mëdha dhe sidomos kur dihet që është blerje ekskluzive e trajnerit. Sakaq, dje i veçuar nga grupi është stërvitur Dorian Kërçiku. Lojtari i linjës së djathtë kreu vetëm vrapime dhe palestër, si pasojë e një kontaktimi të lehtë. Megjithatë, gjasat janë që ai të mos rrezikojë. Mbetet për t'u parë edhe gjendja e Gentjan Muçës, i cili ditët e fundit nuk ka rrezikuar me vrapimet, por ka kryer vetëm terapi.
Stërvitja - Tirana ka vijuar edhe dje përgatitjet me ritëm të lartë. Ze Maria kishte në program dy seanca, ndërsa si gjithmonë gjatë paradites u përqendruan në aspektin atletik dhe pasdite te taktika e teknika. Ngarkesat janë kthyer në pjesë të pandashme për bardheblutë, ndërsa kjo javë është cilësuar si një fazë e mirëfilltë përgatitore. Në mungesë të një kundërshtari dhe mbi të gjitha të mos përsërisnin atë që ngjau me Kukësin (ku vetëm para miqësores e morën vesh që veriorët kishin ardhur me lojtarë prove), sot është menduar që të realizohet një ndeshje brenda grupit. Veç organikës prej 23 lojtarësh që kanë në dispozicion (pa Moisen, që nuk ka ardhur ende), do të marren edhe disa elementë nga të rinjtë, të cilët do të vëzhgohen.