Në Lezhë peng të kontratave
Mbrojtësi Jurgen Goxhaj: Pres lejen e presidentit Gjok Noka, kam disa oferta
Disa nga futbollistët e Besëlidhjes u huazuan te Shënkolli gjatë kampionatit të kaluar. Lojtarët si lezhjanët Rudolf Turkaj e Arlind Nekaj, shijakasi Jurgen Goxhaj, e ndonjë tjetër, u huazuan tek ekipi tjetër i rrethit të Lezhës. Mbrojtësi Jurgen Goxhaj e veshi fanellën e Besëlidhjes në kuadër të merkatos së verës së shkuar i sjellë nga trajneri Stavri Nica dhe luajti si titullar deri afër fundit të gjysmës së parë të sezonit dhe më pas u huazua te Shënkolli ku edhe aty ishte titullar.
GOXHAJ
Gjatë një bisede për "Panorama Sport", mbrojtësi Jurgen Goxhaj shpreh dëshirën e tij për t'u përfshirë në merkaton e verës, por më parë i duhet leja nga presidenti Gjok Noka për një lëvizje të mundshme. "Unë në merkaton e verës së shkuar vesha fanellën e Besëlidhjes dhe për këtë jam shumë i lumtur për mundësinë që m'u krijua. Gjatë kohës që isha te Besëlidhja, kam luajtur gati në të gjitha ndeshjet, nga të cilat vetëm në një kemi humbur. Dhe për atë, edhe sot e ndiej dëshpërimin. Gjithsesi, këto janë gjëra që i përkasin botës së futbollit dhe ne nuk mund t'i shmangim dot që të gjitha. Duke mos pasur shumë hapësirë gjatë gjysmës së dytë të sezonit në formacion, pasi u sollën disa futbollistë për llogari të merkatos së janarit, përfshi edhe mbrojtës, unë u huazova te Shënkolli dhe kam luajtur si titullar. Duke e ditur se jemi në kulmin e merkatos verore, unë kam pasur disa oferta, por do të pranoj ndonjë me leverdi vetëm nëse më lejohet nga presidenti i Besëlidhjes, pasi aty jam ende në kontratë. Ndërsa, sa i përket Shënkollit, nuk e di, por ka shumë gjasa që të mos jem më pjesë e kësaj skuadre simpatike. Është momenti që të provoj diçka tjetër në karrierën time", përfundoi prononcimin e tij për gazetën mbrojtësi Jurgen Goxhaj. Ndërkaq, pritet që në korrik të mësohet më shumë në lidhje me skuadrën lezhjane për sezonin e ri. Aktualisht, lojtarët janë me pushime dhe do të grumbullohen vetëm kur të thirren nga presidenti Gjok Noka. Lezhjanët kërkojnë prej tetë sezonesh që të ngjiten në Superiore, por nuk ia kanë arritur qëllimit. Tashmë do të shihet se çfarë synimesh do të ketë ekipi për sezonin e ri.