Botërori në rrezik nga huliganizmi: Rusët po stërviten në palestër për dhunë
Ultrasit përgatiten për përleshje masive verën e ardhshme
Një qytet pranë kufirit rus me Letoninë është dhe vendi ideal për t'u fshehur për një njeri që akuzohet si shkaktari i sulmeve ndaj tifozëve anglezë në Marsejë verën e shkuar, njëri prej të cilëve mbeti i plagosur në gjendje kritike për jetën. Velikije Luki u mor nga gjermanët në marshimin e tyre drejt Moskës gjatë Luftës II Botërore dhe thuajse u shkatërrua gjatë betejës në të cilën rusët e rimorën. Memorialët e shkatërruar të të rënëve janë pjesë e madhështisë. Kur treni i natës që vjen nga Shën Pjetërburgu të lë aty gjatë ditës, nuk gjen asnjë vend të hapur për tri orë. Aleksander Shprigin shfaqet aty gjatë drekës dhe kupton menjëherë që bëhet fjalë për kryeultrasin e rusëve për shkak të fizikut të tij të bëshëm. I njohur me nofkën "Comanche" (fis amerikan autokton), ai mban si suvenir abonimin e tij për Kupën e Konfederatave që ka kushtuar 8 mijë rubla (110 euro), pasi autoritetet nuk e lejuan të hyjë në stadium për ndeshjen e parë kundër Zelandës së Re. 50 huliganëve të tjerë u erdhi lajmërimi se pa kartën e tifozit, ata nuk do të mund të hynin në stadium. "Ajo për të cilën më vjen keq është se përse pritën deri tani për të na penguar që të hyjmë në stadium", thotë. Ai tregon se rrënjët e kulturës së huliganizmit shtrihen në kohën pas rënies së Bashkimit Sovjetik, kur tifozët fanatikë të klubeve ruse përlesheshin në mes të rrugës në mënyrë të organizuar. Fotografi Mikail Domozhikov, i cili është lejuar që të hyjë mes këtyre grupeve, thotë se këto përleshje vazhdojnë edhe sot e kësaj dite, madje huliganët kryejnë stërvitje të organizuar në palestra. Disa grupe stërviten në pyll për të mos u pikasur nga autoritetet. Një nga dëshmitë më të frikshme të përleshjeve masive mes tifozërive rivale është mes grupit të ultrasve të CSKAsë së Moskës, "Jaroslavka" dhe "Music Hall" të Zenitit të Shën Pjetërburgut. Mjafton të kërkoni në "YouTube" për të konfirmuar dhunën çnjerëzore, e cila rrezikon turneun e verës së ardhshme.