Lëv: Kundër Kamerunit maksimumi 5 ndryshime
"Rydiger titullar, portën s'e kam vendosur. Në 1/2-at doja Rusinë"
Sot, në orën 17:00, ko mbëtares gjermane do t'i mjaftojë vetëm një pikë ndaj kampionëve të Afrikës, Kamerunit, për të siguruar biletën në gjysmëfinale në Kupën e Konfederatave. Në preludin e takimit të fundit të Grupit B, foli trajneri Joakim Lëv.
Pas ndeshjes me Kilin paralajmëruat ndryshime në formacion kundër Kamerunit, kush do të luajë?
Po planifikoj që Toni Rydiger të rikthehet titullar. E kisha bërë në plan që përpara ndeshjes, sepse Kameruni ka lojtarë shumë të shpejtë. Nuk do të luajmë me të njëjtën skuadër si ndaj Kilit. Do fus 1 apo 2 lojtarë të rinj, por nuk mund të bëj rrotacion masiv. Nuk mund të ndryshoj 7 apo 8 lojtarë, sepse duhet ruajtur bërthama e ekipit. Tre, katër, ndoshta pesë ndryshime janë të arsyeshme. Shtatë ose tetë janë shumë.
Çfarë pritshmërish keni ndaj Kamerunit?
Nuk jemi kualifikuar ende në gjysmëfinale. Askush nuk duhet ta shohë këtë ndeshje si një formalitet. E rëndësishme është të luajmë si në dy ndesh- jet e para. Kameruni nuk ka asgjë për të humbur. Ata mund të kualifikohen nëse fitojnë. Kjo do të jetë ndeshja më intensive dhe fizike. Asnjë skuadër në këtë turne nuk ka agresivitetin e Kamerunit. Shikoni se sa shpejt kalojnë nga mbrojtja në sulm. Kanë shumë sulmues të shpejtë. Rrallë shikon një ekip me këtë përzierje rezistence dhe shpejtësie. E rëndësishme për ne do jetë të sigurojmë biletën në gjysmëfinale. Si të parët apo të dytët, kjo pak rëndësi ka.
Mund të kemi rrotacion në portë?
Nuk e di ende. Duhet të flas me Andi Këpken për këtë. Ne planifikuam që çdo portier të luajë një ndeshje. Nuk e kemi vendosur ende nëse do të vazhdojmë të bëjmë rrotacion, apo do të luajmë me të njëjtin portier.
Kë do të preferonit si rival në gjysmëfinale?
Nuk më intereson emri i kundërshtarit. Si vend organizator, do të më pëlqente Rusia ( u eliminuan pas konferencës). Do të ishte një atmosferë shumë e bukur përpara Botërorit. Por fillimisht duhet të bëjmë hapin e radhës dhe ai është mposhtja e Kamerunit. Pasi ta kemi bërë këtë, do të shohim si do të përgatitemi për rivalin e radhës.