KOKSH-i: Janë respektuar të gjitha afatet statutore
Komiteti Olimpik Kombëtar Shqiptar ka informuar po dje se, pas mbledhjes së Komitetit Ekzekutiv, janë ndjekur të gjitha procedurat, duke respektuar dhe të gjitha afatet statutore për përbërjen publike të listës së kandidatëve të shpallur në faqen e internetit të KOKSH-it. "Statuti i KOKSH-it ka një pikë të rëndësishme, Neni 16 Pika 2.2 që i referohet parimit të gjithë përfshirjes të Kartës Olimpike ku i kërkohet çdo anëtari të bëjë propozimin e një kandidati për një nga pozicionet për të cilën Komiteti Ekzekutiv i KOKSH-it është shprehur zyrtarisht. Për sa i përket çështjes së propozimit të jo më shumë se 1 kandidature të vetme nga ana e çdo anëtari të KOKSH-it, ju sqarojmë sa më poshtë: 1. Komiteti Ekzekutiv i KOKSH-it, në mbledhjen e datës 20.06.2017 mori vendim në mënyrë unanime dhe konsensuale nga të gjithë anëtarët, pasi konstatoi se disa federata sportive në kundërshtim me nenin 16 pika 2.2 e Statutit kishin paraqitur nga 1 kandidaturë për secilin pozicion (President, Zv/President, Trezorier dhe anëtar të Komitetit Ekzekutiv) pra në total 3-4 kandidatura për anëtarë të Komitetit Ekzekutiv (pasi të gjitha pozicionet e lartpërmendura janë mbi të gjitha anëtarë të Komitetit Ekzekutiv të KOKSH). 2. Komiteti Ekzekutiv vendosi t'u kërkojë federatave respektive, respektimin e Statutit të KOKSH-it, si dhe përzgjedhjen e një kandidature të vetme nga pozicionet e lartpërmendura. Logjika statutore dhe institucionale është mjaft e thjeshtë, të parandalojë raste eventuale ku 1 Federatë sportive të ketë më shumë se 1 anëtar në Komitetin Ekzekutiv dhe teorikisht nëse një gjë e tillë do të lejohej, potencialisht 1 federatë mund të kishte deri në 4 anëtarë të Komitetit Ekzekutiv të KOKSH-it nga 11 anëtarë që ka gjithsej ky Komitet. 3. Kjo është procedura e ndjekur nga KOKSH-i në çdo moment në përputhje me Statutin e tij, e cila u është bërë me dije sigurisht Departamenteve përkatëse në Komitetin Olimpik Ndërkombëtar", thuhej në sqarimin e Komitetit Olimpik.