"De Biazi është burri i parë që doja të puthja"

Andi Lila ka qenë i vetmi nga lojtarët e Kombëtares që ka folur në ceremoninë e lamtumirës me ish-trajnerin e Kombëtares. Mbrojtësi ka zbuluar edhe një nga momentet më të veçanta të bashkëpunimit me trajnerin italian dhe ka të bëjë me vendimin për ta aktivizuar futbollistin në formacionin titullar kundër Francës. "Për të treguar për trajnerin duhet një natë dimri, por dua të tregoj vetëm dy gjëra personale. E para, vjet në Francë, në ndeshjen ndaj Zvicrës, trajneri nuk më futi fare. Për ndeshjen e dytë, dy ditë para, trajneri bëri formacionin dhe ndau jelekët. Aty e kuptova që do isha në formacion dhe për herë të parë në jetën time doja të puthja një burrë. E dyta, para ndeshjes me Izraelin, ose pas Luksemburgut, situata ishte shumë e vështirë, trajneri nuk qeshte fare dhe po mendoja të bëja diçka për ta shtensionuar gjendjen. Në një nga mbledhjet, trajneri na jep një fletë dhe na thotë të bënim formacionin dhe taktikën. Thashë me vete: 'Tani më erdhi në dorë, ose të bëj diçka mirë, ose trajneri të më thotë merr çantën edhe ik'. Pasi bëra formacionin, veten time e vura në kllapa në kuptimin që ose të më fuste ose jo dhe poshtë shkrova emër mbiemër dhe futa firmën time. Në stërvitje trajnerin e pashë që po qeshte dhe tha: 'Dy gjëra më pëlqyen: Një lojtar e bëri formacionin me 12 veta dhe njëri që kishte firmosur poshtë'. Situata sikur u rregullua disi. Mister, ti po ikën, por do jesh gjithnjë në zemrën e gjithë shqiptarëve dhe timen personalisht", është shprehur Lila, i cili ka theksuar disa herë që nuk pranoi që të lexonte letrën e ofruar nga zyra e shtypit të FSHF-së.