Lushnja, me plan “B” për stadiumin e Superiores

Fieri dhe Berati shikohen si alternativat e mundshme për verdhejeshilët në fillim të sezonit

Kur kanë mbetur edhe 20 ditë nga afati për licencimin e stadiumit "Roza Haxhiu" në Kategorinë Superiore, në impiantin lushnjar nuk janë hedhur ende hapat e para për rikonstruksionin e tij. Stadiumi i Lushnjës duhet të plotësojë kushtet e vëna nga sektori i licencimit, por një gjë e tillë kërkon shumë kohë dhe shpenzime. Me të gjitha gjasat, Lushnja do ta nisë Superioren jashtë "Roza Haxhiut". Për të qenë afër në aspektin gjeografik, si dhe për të ndihmuar tifozët, Lushnja mund të luajë në Berat ose në Fier. Një gjë e tillë nuk është konfirmuar nga Bashkia e Lushnjës, por një gjë është e sigurt: rikonstruksioni i stadiumit "Roza Haxhiu" po vonohet. Kjo ka sjellë shqetësimin e dashamirësve të skuadrës, si dhe rënien e atmosferës sportive pas rikthimit në elitë. PRECEDENTI

Lushnja e ka një precedent në lidhje me përmirësimin e kushteve të stadiumit dhe rikonstruksionin e fushës. Bëhet fjalë për sezonin 2003-2004, kur për këto arsye skuadra verdhejeshile luajti në "Roza Haxhiu" vetëm tri ndeshjet e fundit. Edhe atëherë, kampionati ishte me 10 skuadra dhe 4 faza. Skuadra luajti në Lushnjë 3 nga 18 ndeshjet shtëpiake, por në fund realizoi mbijetesën.

EKIPI

Në fillim të korrikut mendohet që Lushnja të dalë në fushë. Një gjë e tillë pritet të konfirmohet edhe nga drejtuesit e Bashkisë. Lushnjës i duhet të dalë më shpejt se herët e tjera në fushën e stërvitjes. Burime pranë klubit për "Panorama Sport" thanë se do të diskutohet mundësia për të grumbulluar skuadrën jashtë vendit. Nëse fillojnë punimet në "Roza Haxhiu", Lushnja mbetet dhe pa fushë stërvitore. Kështu që në plan është edhe grumbullimi i skuadrës jashtë vendit. Bashkë me elitën, Lushnja po përballet edhe me situatën financiare për të plotësuar kriteret më minimale: fazën përgatitore, afrimin e disa lojtarëve dhe kushtet e licencimit për stadiumin "Roza Haxhiu". Alban Alushi