Të gjithë nën kontratë, por ka dilema për Rexhinaldon

Luftëtari pritet të zbresë në fushë në javën e parë të korrikut, por më parë klubi duhet të zgjidhë disa dilema, për të cilat tifozët gjirokastritë mbeten në ankth. Së pari, ende nuk është e qartë nëse trajneri Mladen Milinkoviç do të qëndrojë te Luftëtari. Serbi i bëri për vete të gjithë në sezonin e fundit, duke fituar një popullaritet të madh, jo vetëm në Gjirokastër, por tek të gjithë futbolldashësit. Është fakt se Milinkoviç u pa me shumë skepticizëm në fillimin e kampionatit të kaluar, por profesionalizmi i tij bëri që Luftëtari ta mbyllte në vendin e katërt, një pozicion që kishte dy dekada që nuk arrinte në Kategorinë Superiore. Presidenti Grigor Tavo i besoi sugjerimit që i dha për trajnerin kompania e menaxhimit "PPA World", e drejtuar nga Paskal Papdopulos. Ky i fundit bashkëpunoi ngushtë me drejtuesit gjirokastritë, duke afruar te Luftëtari thuajse të gjithë të huajt, teksa dy prej tyre, Edi Bojom dhe Arturo Rexhinaldo, rezultuan si zbulime të sezonit në Kategorinë Superiore. Tashmë nga klubi gjirokastrit janë larguar zyrtarisht dy lojtarë: Vangjel Zguro dhe Usama Mutumane. Mirëpo, dilemat janë të mëdha nëse do të vazhdojnë të luajnë me fanellën bluzi kamerunasi Bojom dhe mozambikasi Rexhinaldo, i cili e mbylli sezonin me tetë gola të realizuar. Mbrojtësi u ankua për mosshlyerje në kohë të detyrimeve dhe tashmë rrezikon të gjobitet, pasi është nën kontratë. Nga ana tjetër, burime të "Panorama Sport" pranë klubit tregojnë se dilemat janë të mëdha për qëndrimin e Rexhinaldos. Ky i fundit ka disa oferta nga klube të kampionateve më të forta dhe nuk dihet nëse do të rinovojë marrëveshjen. Megjithatë, në Gjirokastër janë të qetë, sepse 90% e grupit që mbylli sezonin është nën kontratë jo vetëm për sezonin e ri, por deri në 2019-ën. Strategjia që kanë ndjekur drejtuesit ka rezultuar efikase dhe tashmë pritet që klubi të arkëtojë shuma të mëdha në rast shitjeje të Dejvi Bregut, KristalAbazajt dhe Shkëlzen Ruçit. Për dy sulmuesit dhe portierin kanë ardhur oferta zyrtare nga klube europiane. Tomor Shehu