Tirana krijon “panik”, Besëlidhja ka dilema
“Yjet” e skuadrës drejt largimit, trajneri bëhet çështje
Vijon qetësia në radhët e Besëlidhjes dhe nuk dihet se deri kur do të zgjasë. Ka shumë gjasa që pas zgjedhjeve politike drejtuesit e klubit do t'i kthehen rutinës së merkatos verore. Megjithatë, do të pritet edhe ndarja përfundimtare e grupeve të Kategorisë së parë për sezonin e ri që drejtuesit të vendosin nëse do të ndërtojnë grup që të synojë elitën apo jo. Fakti që Tirana sipas të gjitha gjasave do të jetë në Grupin A, e bën garën më të frikshme për ekipet e tjera duke parë grupin dhe mbështetjen që kanë bardheblutë. Në këtë mënyrë, drejtuesit e Besëlidhjes mund të stepen për sa u përket investimeve që duhet për të rivalizuar për vendin e parë. Dihet tashmë që vetëm skuadra e parë e grupit ngjitet në Superiore.
SITUATA - Nga ana e presidentit Gjok Noka ka pasur një deklaratë të fortë disa ditë më parë ku paralajmëronte se do të ketë "revolucion" në radhët e Besëlidhjes pasi nuk u arrit objektivi. Ndonëse ka kaluar mbi një muaj nga kjo deklaratë, ende nuk ka ndonjë lëvizje zyrtare përveç disa alibive që tashmë janë publikuar nga media. Që në javën e parë të këtij muaji, drejtori teknik i Besëlidhjes, njëkohësisht dhe menaxheri shqiptar i futbollistëve guineas, Kristi Memi lajmëroi për transferimin e sulmuesit Sekou Kamara drejt Zorias së Luhanskut të Ukrainës. Ndërsa mesfushori tjetër guineas Lancinet Sidibe ka oferta nga Superiorja dhe se do të transferohet, por deri tani nuk ka ndonjë konfirmim zyrtar për këtë lëvizje të mundshme. Po ashtu, në fokusin e merkatos së kësaj vere është edhe mbrojtësi i majtë kurbinas Edison Ndreca që kërkohet nga ekipe të Superiores, por ende nuk ka ndonjë konfirmim, as nga klubi dhe as nga vetë futbollisti. Duke e ditur se të gjithë futbollistët e Besëlidhjes pa përjashtim janë nën kontratë, u duhet leja nga presidenti Gjok Noka për t'u larguar.