Interi bën ofertë “faraonike” për Di Marian

“Suning” tenton argjentinasin me një rrogë 11 milionë €

Që "Suning" po përpiqet të blejë një superlojtar si surprizë për tifozët zikaltër, nuk është më një lajm i ri. Grupi kinez i ka kërkuar Auzilios që të piketojë një lojtar të rëndësishëm, i cili është më i mundshëm për t'u arritur. Pavarësisht këmbënguljes së madhe të Zhang për një blerje të bujshme, Auzilio i ka idetë e qarta: Në fillim duhet të shiten disa lojtarë që janë jashtë planeve të Spaletit, për të tentuar më pas goditjen e madhe. Shumë emra të rëndësishëm po qarkullojnë këto ditë në mediat italiane si objektiva të Interit, por duket se vëmendja zikaltër është vetëm te një.

INTERI DO DI MARIANZikaltrit kërkojnë vetëm atë: Yllin argjentinas, Angel Di Maria. Interi ka si qëllim për- forcimin e ekipit që të konkurrojnë këtë sezon në kampionatin italian, me kualifikimin në Ligën e Kampionëve si objektiv minimal për sezonin e ardhshëm. Ky lajm është bërë i ditur nga media spanjolle "Fichajes.net", të cilët janë të bindur se argjentinasi është objektivi numër 1 i Interit. Grupi "Suning" është i gatshëm të ofrojë plot 50 milionë euro për kartonin e fantazistit të PSGsë, shifër që do të plotësonte të gjithë kushtet e vendosura nga ekipi francez. Interi, për ta bindur lojtarin të vijë te një ekip që nuk do të marrë pjesë në Ligën e Kampionëve, është gati t'i ofrojë lojtarit një rrogë me shifra marramendëse, që për momentin nuk i fiton asnjë në klubin zikaltër. Ata i kanë garantuar Di Marias një kontratë me rrogë 11 milionë euro në sezon, plot 2 milionë euro më shumë se ajo që ai përfiton te PSG-ja.