Spektakël i Gjermanisë, 3 gola për gjysmëfinalen
Renditen në krye, përballen ndaj Meksikës. VAR gabon sërish
Gjermania në gjysmëfinale dhe për këtë nuk kishte shumë dyshime në vigjilje të ndeshjes së fundit në Grupin B, kundër Kamerunit. Kampionët e botës fitojnë 3-1 ndaj kampionëve të Afrikës dhe lënë pas Kilin, që u ndal nga Australia: kundërshtari i radhës i Drakslerit me shokë do të jetë Meksika (të enjten ora 20:00). Protagonistët e ndeshjes janë Kerem Demirbej dhe Timo Verner: fantastik goli i të parit, dopjetë për të dytin. Askush nuk kishte shënuar më parë me fanellën e "pancerave". Por protagonist, këtë herë në kuptimin negativ është edhe VAR (Video Assistant Referee): në pjesën e dytë arbitri Roldan kërkon ekranet e asistencës për autorin e një ndërhyrje të rëndë në gjurin e Xhanit. Kthehet në fushë dhe ndëshkon me të kuq Sianin, i cili në fakt është personi i gabuar. Vetëm pak sekonda më vonë, ai korrigjohet duke larguar Mabukan. Kjo është njolla e radhës e teknologjisë. Por le të flasim për Gjermaninë, e cila 12 vite pas asaj të 2005-ës, rikthehet në gjysmëfinalen e Kupës së Konfederatave. U deshën 21 minuta që Gjermania të shfaqej. Dhe rasti i parë i takon Emre Xhanit (ishte dëmtuar në stërvitje dhe nuk pritej të ishte titullar). Por e djathta në hyrje të zonës e talentit të Liverpulit përfundoi jashtë për pak centimetra. Por ai që shpërdoroi avantazhin e vërtetë ishte Kimish, që në zhytjen e tij pas krosimit të Platenhardit nuk arrin të shënjestrojë portën e Ondoas. Basogog shpërdoron një kundërsulm për Kamerunin në fund të pjesës së parë, përpara se Ter Shtegen të bëjë mrekullinë ndaj Anguisas. Por Gjermania e sheh veten në avantazh në fillim të pjesës së dytë: Draksler jep asist me thembër për Demirbej dhe goditja nga jashtë zone ndalet në trekëndësh. Kameruni bëhet i rrezikshëm me Abubakarin dhe Ngamaleun, por në minutën e 64-ët mbeti me 10 veta pas ndëshkimit të Mabukas. Në superioritet numerik, gjermanët dyfishojnë me Vernerin: krosim i saktë i Kimish dhe zhytja me kokë e sulmuesit shtang Ondoan. Abubakar shkurton me kokë diferencën në 78' pas një pasigurie të Ter Shtegenit. Por kur ndeshja rihapet, mendon sërish Verner për ta mbyllur me të djathtën e tij pas asistit të Henriks. Dhe është Ondoa ai që shmang goleadën pasi u përgjigjet 3 goditjeve të Junesit dhe Vernerit.