Xhalhanoglu, dëshira e “Djallit”

Agjenti i lojtarit e pohon: Bisedimet kanë nisur, por nuk mund t'ju them më shumë

Ipandalshëm Milani i sivjetshëm në merkato, jo më kot është klubi i parë në rang europian që ka shpenzuar më shumë për t'u përforcuar. Tipari dallues i drejtuesve të "Djallit" është bërë lëvizshmëria e madhe në tregun e futbollistëve, ku milanezët po përgatisin goditjen e radhës. Pas Rikardo Rodrigez, kuqezinjtë "peshkojnë" rishtazi në Gjermani. Këtë herë gjahu është Hakan Xhalhanoglu, fantazisti 23-vjeçar, i cili prej tre vitesh aktivizohet në radhët e Bajer Leverkusenit. Sipas së përditshmes gjermane "Bild", Milani ka arritur një marrëveshje të përgjithshme me agjentin e lojtarit, i cili nuk do të ishte kundër një përvojë në një kampionat të huaj. I lindur në Manhajm të Gjermanisë dhe rritur tek ekipet zinxhirë të qytetit të lindjes, karrierën si profesionist e nisi me Karlsruhen, nga ku u largua pas dy vitesh për t'iu bashkuar Hamburgut. Në 2014, kalon te Leverkuseni ku shpërthen përfundimisht. Tri vite në radhët e "Aspirinave", gjatë të cilave koleksionoi 80 ndeshje dhe 19 gola, i vlejnë për t'u afirmuar në kampionatin gjerman.

Mesfushor krahu dhe fantazist janë dy rolet e tij të parapëlqyera, pa harruar dhe specialitetin që janë goditjet e dënimit. Elegant, me klas dhe një të majtë të frikshme do të ishte ideal për skemat e Montelës, pavarësisht aktivizimit si mesfushor apo sulmues krahu.

Si për të konfirmuar vërtetësinë e lajmit, agjenti i Xhalhanoglu, Bektash Demirtas, i pyetur nga mediat gjermane,

ka deklaruar se: "Po, është e vërtetë që ka disa kontakte mes meje dhe Milanit që është një nga klubet më të mira europiane. Biseda jonë ka prekur tematika të ndryshme, por preferoj të mos sqaroj detajet në këtë moment". Në Leverkusen, lojtari

vlerësohet rreth 30 milionë euro, por administratori Fasone kërkon arritjen e marrëveshjes me klubin gjerman mbi bazën e 20 milionëve, teksa gazeta gjermane konfirmon akordin me futbollistin, pavarësisht se nuk përmenden shifra.