Konte: E mendova largimin nga Çelsi
Trajneri shpjegohet: E pata të vështirë qëndrimin larg familjes
Nostalgji për familjen dhe Italinë, merkato që nuk po bindte pas një sezoni fitues ( por megjithatë të lodhshëm) ku ishte shpallur kampion i Premier Ligës dhe së fundi edhe joshja e Interit. Antonio Konte kishte menduar vërtet të largohej nga Çelsi. Dhe e pohon në një intervistë të gjatë të dhënë për shtypin anglez ditën e djeshme, duke i dhënë fund heshtjes që zgjaste gjashtë muaj. "Pas një sezoni të vështirë, është vërtet e rëndësishme të shohësh pas, të reflektosh mbi sezonin që u mbyll. Ka qenë eksperienca ime e parë në Angli, në një vend të ri dhe me mungesën e familjes sime. Duhet të jem i ndershëm: ka qenë një periudhë shumë e vështirë për mua dhe për familjarët e mi. Kur fiton, mendon se gjithçka është më e lehtë, por realisht nuk është kështu", shpjegon Konte, që disa kohë më parë ka firmosur edhe kontratën e re me Çelsin (11 milionë euro në sezon).
E ARDHMJA - Meditimi ka zgjatur disa javë, më pas Konte ka larguar çdo dyshim, pavarësisht kërkesës së vazhdueshme nga zikaltrit. "Kam zgjedhur të vazhdoj me Çelsin sepse gjetëm një mënyrë për të parë së bashku të ardhmen. Çelsi është një klub i madh, por nuk mund të gabojmë, do të ishte e rrezikshme. Duhet të përmirësohemi dhe të rritemi për të ndërtuar diçka të madhe".
MORATA DHE DIEGO KOSTA - Blerja e Moratës i ka rikthyer buzëqeshjen trajnerit italian. "E kam kërkuar që në kohën kur drejtoja Juventusin. Atëherë ishte shumë i ri, por tashmë ka fituar më shumë eksperiencë dhe është gati për Çelsin. Ai dhe Lukaku janë në të njëjtin nivel, zgjedhje të para për klube si Çelsi dhe Junajtid".
Në vazhdim, Konte qartëson edhe çështjen Diego Kosta: "Situata ka qenë e qartë që në janar: në fund të sezonit, rrugët do të ishin ndarë. Kam respektuar vendimin tim. Është për t'u çuditur që dikush ka mbetur keq".
RAPORTI ME ABRAMOVIÇ - Me Roman Abramoviç
duket të jetë kthyer qetësia, Konte jep fjalën: "Për çdo trajner është e rëndësishme të shprehë idetë dhe për të ndërtuar themele të forta shërben besimi i klubit. Gjithmonë kam dashur ta vazhdoj projektin me Çelsin, ndaj vendosa të rinovoj kontratën me klubin".