Edhe Murinjo në luftë për Verratin, ofertë zyrtare prej 80 mln € për PSG-në

Pritet të jetë vendimtar Mino Raiola, menaxheri i ri i mesfushorit

Zhoze Murinjo, Marko Verrati, Mino Raiola. Tre emra që mjaftojnë për të kuptuar që afron një lëvizje e madhe në merkato. Mançester Junajtid mendohet të ketë paraqitur një ofertë prej 60 milionë sterlinash (rreth 78 milionë euro) për Marko Verratin. E konfirmon shtypi anglez, sipas të cilit "djajtë e kuq" kanë shfaqur një interes të madh për mesfushorin italian (me vitlindje 1992), i cili së fundi është tashmë një klient i Mino Raiolës, një menaxher i mësuar me transferime të këtij niveli. KËRKOHET MARSIAL - Nga Parisi, megjithatë, duket të jenë të gatshëm të nisin bisedimet vetëm nëse në marrëveshje do të përfshihej kartoni i Entoni Marsial, sulmuesi anësor i "djajve të kuq" që pëlqehet edhe nga Interi. Zikaltrit kanë provuar ta transferojnë në Milano, duke kaluar në Angli mesfushorin kroat Ivan Perisiç, por Mançester Junajtid ka bërë mur. PSG-ja e sheh kështu veten në qendër të një trinomi të merkatos, pas asaj që mund të kalojë Nejmarin nga Barcelona në Francë, për 222 milionë euro.

ME MËNYRËN E RAIOLËS - Gjithmonë duke u mbështetur te lajmet e shtypit anglez, bisedimet me drejtuesit parisienë janë nisur nga Ed Uduard, zëvendëspresidenti i Junajtid. Dhe fakti që tanimë Verrati po ndiqet nga Raiola, mund të jetë një avantazh për klubin anglez. Agjenti ka menaxhuar edhe transferime të pasura në favor të Mançesterit, si Pogba, Ibrahimoviç, Lukaku, Mkhitarjan dhe ka gjithashtu raporte shumë të mira me PSGnë, ku ka kaluar Matuidinë, vetë Ibrën dhe Maksuellin.