7 rebuset e Montelës përpara sfidës europiane
Fitorja ndaj Bajernit është një ogur i mirë që lejon të shpresohet për të ardhmen, por sidoqoftë mbetet thjesht miqësore. Mes shumë çështjesh, shtatë duken si më të rëndësishmet që trajneri Montela duhet sa më shpejt t'i japë drejtimin e duhur.
1) Patrik Kutrone - 19 vjeç dhe dy gola ndaj Bajernit në 18 minuta. Klubi kërkon të zvogëlojë organikën, por a mund të lihet jashtë dikush që në të gjitha grupmoshat e ekipeve zinxhir kuqezi ka shënuar 110 gola? Me Milanin, që kërkon një sulmues të sprovuar, a mund t'i besohet Andre Silvës duke graduar Kutronen zëvendëszyrtar të portugezit? Sfida ndaj bavarezëve në Shenzhen nuk mund të jetë përgjigjja e këtyre pyetjeve, por me aq sa ka treguar Kutrone një rol gregari në organikë mund të mbulojë pa problem.
2) Karlos Baka - Zyrtarisht në shitje, pasi Montela kërkon një sulmues që të ndihmojë manovrën ekipore me kolumbianin që garanton gola, por jo lojë skuadre. "Djalli" kërkon të arkëtojë mbi 20 milionë euro, por Marseja vazhdon presionin duke kërkuar thjesht huazim pasi dihet bollëku në sulm i Milanit që nuk do të dëshirojë të mbajë Bakën për t'i paguar rrogën pa luajtur.
3) Merkato e sulmit - Nikola Kaliniç duket se do të jetë dhurata për Montelën, me kroatin që garanton gola dhe lojë skuadre. Ardhja e tij nuk përjashton njërin mes Belotit dhe Aubamejang, me këtë të fundit që kërkon kuqezinjtë dhe jo Kinën. Borusia ka përgënjeshtruar marrëveshjen për një transferim të gabonezit në janar dhe mund të ulë pretendimet ekonomike
4) Skemat - Trajneri Montela mundi Bajernin me modulin e tij të preferuar 4-3-3. Statusin e të paprekshmit te ky Milan s'e ka askush, ndaj i rrezikuari kryesor është Suso me të palodhurin Borini që i kërcënon vendin spanjollit. Edhe me 3-5-2 vështirë që Suso t'i rrëmbejë vendin Andre Silvës, për të cilin Milani investoi 40 milionë euro. Me skemën e dytë, Suso duhet të tërhiqet në mesfushë, por nëse në krah duhet të duelojë me Kontin për vendin e titullarit, në mesfushë duket e pamundur t'i vidhet vendi Frenk Kesi, i cili ka marrë frerët e mesfushës kuqezi në këtë fillimsezoni. Sidoqoftë, "Djalli" ka besim te spanjolli, pasi ka refuzuar ofertat për të dhe mendon t'i rinovojë kontratën.
5) Xhakomo Bonaventura - A mund ta lënë jashtë skuadre skemat dhe merkato Xhekun? Duket e vështirë. I konsideruar si "xholi" i skuadrës, Montela ka deklaruar se është ai blerja e vërtetë e Milanit në merkato. "Alter ego" e tij, turku Çalhanoglu ndez fantazinë e tifozëve, ndaj njëri mes dyshes së sipërpërmendur dhe Susos pritet ta pësojë prej bollëkut në organikë.
6) Liga e Europës - Kush do të luajë të enjten në sfidën europiane. Montela tha se do t'u besojë fanella titullarësh atyre që nisën sfidën ndaj Bajernit. Dyshimet janë në krahun e djathë mes Abates të cenuar nga i riu Konti, në mesfushë ku Montolvio ka shfaqur disa probleme fizike dhe trajneri mund t'i besojë Biljas, i cili tregoi formë të mirë në 30 minutat që u aktivizua ndaj bavarezëve. Edhe sulmi paraqet jo pak rebuse, me Borinin të vetëm të sigurt për një fanellë titullari. Në krahun e majtë ku Çalhanoglu kërcënon Niang (më i miri në fushë ndaj Bajernit), ndërsa në sulm 40 milionët e Andre Silvës mund të ulin në stol dygolëshin e të riut Kutrone.
7) Niang - Siç thamë, francezi ishte ndër më të mirët në fushë ndaj skuadrës së Ançelotit. I konsideruar anarkik për lojën e Montelës, ai mbetet në merkato. Me paraqitje si ajo e fundit, 23-vjeçari një shans titullari e meriton, por çështja mbetet te vazhdimësia e tij, ndaj "Djalli" shpreson në ndeshje të mira, për ta përfshirë më pas në akordin që do të sillte Belotin në Milano ose në marrëveshjen me Fiorentinën për Kaliniç.