Teuta thyhet nga Çezena, provohet një ganez
Durrsakët luajnë miqësoren e parë në Itali
Teuta ka luajtur dje ndeshjen e parë miqësore në tokën italiane ku edhe po zhvillon prej disa ditësh përgatitjet. Kundërshtari i parë i skuadrës së Maganit ka qenë skuadra e Çezenës që është pjesë e Serisë B dhe ka lojtarë mjaft cilësorë në përbërje. Por, pavarësisht kësaj, duke parë edhe ngarkesën që lojtarët e Teutës kanë pasur, paraqitja e tyre, sidomos në pjesën e parë, ka qenë e mirë. Në formacionin e trajnerit Magani ka rënë në dy edhe sulmuesi afrikan Latif, i cili ka nisur provën te durrsakët dhe do të mbetet për t'u parë nëse do të firmosë.
PJESA E PARË - Magani ka hedhur formacionin më të mirë që ka në dispozicion në pjesën e parë të ndeshjes dhe durrsakët kanë disa raste për shënim edhe pse vendasit janë të rrezikshëm në kundërsulme. Megjithatë ata do ta kenë të vështirë që të gjejnë hapësira në mbrojtjen mike, e cila është e vendosur mjaft mirë. Kur u duk se kjo pjesë e takimit do të përfundonte në barazim pa gola, në një aksion të gjatë të italianëve, Shkalla realizon autogol, çka bën që skuadra e Çezenës të kalojë në avantazh.
PJESA E DYTË - Me fillimin e fraksionit të dytë të takimit, dy trajnerët kanë bërë edhe ndryshime në formacionet e skuadrave të tyre. Kjo ka bërë që loja e durrsakëve të zbehet disi. Të besuarit e
trajnerit Magani nuk kanë freskinë e duhur në fushë dhe në minutën e 68-të pësojnë edhe golin e dytë, ku autor ishte Paniko. Magani kërkon reagim nga skuadra, por shumë shpejt Jello trefishon shifrat. Ky i fundit është një emër i njohur në vendin tonë, për shkak se e ka kërkuar skuadra e Partizanit. Në minutat e mbetura të takimit, rezultati nuk do të ndryshojë më, edhe pse Teuta është munduar të shënojë të paktën një gol. Durrsakët do të qëndrojnë për tri javë në tokën italiane, ku do të përgatiten për sezonin e ri futbollistik dhe kanë planifikuar që të luajnë edhe pesë ndeshje të tjera miqësore. Me kalimin e ditëve, skuadra do të jetë e formatuar më mirë, duke qenë se një pjesë e lojtarëve janë afruar rishtas dhe nuk e njohin lojën e njëri-tjetrit. J.Rexhmati