Shehi: Lë futbollin pas Europës
"Koliçi është i mirëpritur për të qenë pasardhësi im"
Skënderbeu tashmë është totalisht i përqendruar për ndeshjen e radhës ndaj Mlada Boleslav në turin e tretë të Europa Ligës. Krejtësisht i përqendruar për këtë ndeshje duket i gjithë ekipi, sidomos kapiteni Orges Shehi, i cili nuk pranon të largojë vëmendjen në prag të...
Skënderbeu tashmë është totalisht i përqendruar për ndeshjen e radhës ndaj Mlada Boleslav në turin e tretë të Europa Ligës. Krejtësisht i përqendruar për këtë ndeshje duket i gjithë ekipi, sidomos kapiteni Orges Shehi, i cili nuk pranon të largojë vëmendjen në prag të një sfide kaq të rëndësishme për këtë kompeticion, por sigurisht që deklarata e tij për t'i dhënë fund futbollit pas Europës ka tronditur korçarët. Shehi është shprehur i bindur se Skënderbeu i ka potencialet e duhura për të kaluar në Europa Ligë edhe në fazën e grupeve, ndërsa mirëpret Koliçin si zëvendësuesin ideal të tijin në portën bardhekuqe.
Orges, tani do të luani në turin e tretë. E kishit menduar se mund të shkonit deri këtu pas shortit?
Ne e kemi menduar dhe e kemi besuar që do të bënim rrugë të gjatë. Që në momentet e para kur morëm vesh shortin e dinim që do të ishte e vështirë, por asnjëherë nuk i kemi humbur shpresat dhe kemi vlerësuar çdo moment si të rëndësishëm për të ecur përpara. Natyrisht që kjo është ana jonë e fortë, vlerësimi që i bëjmë çdo kundërshtari. Në turin e dytë kishim përballë një kundërshtar të fortë, por kemi bërë maksimumin për të kaluar dhe ia dolëm.
Keni zhvilluar dy ndeshje perfekte me Kairatin. Përqendrim dhe vlerësim apo diçka tjetër?
Sigurisht që përballë një kundërshtari të fortë, sidomos në ndeshjet e Europa Ligës, kërkon përqendrim dhe impenjim maksimal. Normalisht kur ke vlerësim dhe respekt për kundërshtarin, por edhe përqendrimin e duhur në fushë, të bën të shprehesh më mirë dhe të jep garanci për të
dhënë maksimumin.
Ka të bëjë dhe eksperienca në këtë pikë?
Sigurisht edhe ky është faktor mjaft i rëndësishëm, pasi kur je pjesë e një ekipi që ka eksperiencën e duhur dhe ka shkuar deri në grupet e Europës, eksperienca luan rolin e vet dhe të jep më shumë garanci.
Sa e vështirë është tashmë përballë Mladës?
Mendoj se është një ndeshje e vështirë dhe kjo dihet tashmë. Është një kundërshtar që si ne ka dalë në turin
e tretë të Europës, një kundërshtar që zhvillon një lojë të mirë pavarësisht se nuk kemi shumë informacion për lojtarët që ka në përbërje, por është një kundërshtar i fortë që vjen nga një ligë e rëndësishme e Europës.
Sa e ndihmon ekipin fakti që do të luhet në Çeki ndeshja e parë?
Puna e shortit është kjo. Në të tilla ndeshje nuk luan shumë rol fusha pasi janë dy takime vajtje-ardhje, por gjithsesi mendoj se duke e pasur ndeshjen e parë atje, do të jetë
një eksperiencë e mirë si me Kairatin.
Ndeshjen e dytë do ta luani në Elbasan. Një minus ky për ekipin?
Natyrisht që po, do të jetë një atmosferë krejt ndryshe nga ajo që na priste në Korçë, por sigurisht e dimë që edhe atje do të ndiejmë mbështetjen. Është një minus, por besoj se do ta përballojmë me sukses.
Ka qenë Skënderbe solid në këto dy takime. A e ka mundësinë të përsëritë aventurën e dy sezoneve më parë?
Sigurisht, unë e kam thënë
që në kampionat gjatë fazës së katërt kemi qenë ekip solid dhe me potencial të madh. Kemi potencialin e duhur për të besuar dhe për të vazhduar rrugën, pavarësisht se sa arrihet në fund.
Flitet shumë që pas Europës e mbyllni me futbollin e luajtur?
Unë e kam thënë edhe më herët që pas Europës ndoshta do e lë futbollin. Tani ndoshta është pothuajse e sigurt dhe fakti që flitet për portierin tjetër e bën akoma më të sigurt. Besoj se është drejt fundit,
por nuk dua që ekipi të fokusohet te kjo puna ime, por te ndeshja dhe kaq. Futbolli i tillë është, njëri e lë, tjetri e fillon dhe kështu me radhë.
Flitet për Koliçin, është pasuesi juaj ideal për Skënderbeun?
Sigurisht, jo vetëm Koliçi, por çdo lojtar që vjen te Skënderbeu është një zgjedhje e duhur sepse ky klub ka nevojë që të ecë përpara dhe lojtarët e zgjedhur janë më të mirët në treg. Besoj që është zgjedhje e duhur, por koha do ta tregojë drejt.