Shkëndija ka statistikat me vete

Shkëndija e Tetovës po bën një paraqitje mbresëlënëse në Ligën e Europës. Skuadra shqiptare e Maqedonisë ka mbërritur deri në turin e tretë ku do të ketë përballë Trakain e Lituanisë. "Kuqezinjtë" për herë të katërt në historinë e paraqitjeve europiane ndeshjen e parë do ta luajnë në transfertë. Të enjten e kaluar në Finlandë kundër HJK Helsinkit, Shkëndija zhvilloi ndeshjen e 20të të Kupat e Europës, ku është përballur nga dy herë me 10 kundërshtarë, pesë prej të cilëve ka arritur t'i eliminojë. Që nga Partizani i Beogradit në debutim në vitin 2011 e deri te HJK Helsinki të enjten, Shkëndija regjistron 8 fitore, 5 barazime dhe 7 humbje. Stacioni i radhës është Vilniusi i Lituanisë, ku do të luhet përballja e parë me Trakain. Pikërisht kjo do të jetë hera e katërt në Kupat e Europës që "kuqezinjtë" ndeshjen e parë do ta luajnë në transfertë. Paraprakisht ka ndodhur me Partizanin në Beograd në vitin 2011, ndërsa dy herët tjera janë në udhëtimin e vitit të kaluar kur ndeshja e parë luhej jashtë kundër Neftçit të Azerbajxhanit dhe Gentit të Belgjikës. Tani ekipi shkon në Lituani për të shkruar një histori të re, duke kërkuar rezultat pozitiv dhe më pas të besojë te kualifikimi në sfidën e kthimit në Maqedoni. Për të pritur sfidën sa më të gatshëm, stafi teknik me futbollistët kanë nisur përgatitjet për këtë sfidë menjëherë pas kthimit në Tetovë pas ndeshjes me Helsinkin. Tani, e gjithë vëmendja është e drejtuar ka Trakai, analizohet kundërshtari dhe kërkohet të përgatitet sa më mirë për t'iu kundërvënë skuadrës lituaneze. Ekipi të mërkurën në mëngjes niset drejt Lituanisë, ku të enjten zhvillon takimin e parë të raundit të tretë eliminator.