Trajneri mban “peng” Luftëtarin, skuadra zbret nesër në fushë
Gjirokastritët mbeten ekipi i vetëm që s’ka nisur përgatitjet
Luftëtari, sipas të gjitha gjasave, pritet që nesër të nisë përgatitjet për sezonin 20172018. Bluzinjtë janë ekipi i vetëm i Superiores që nuk kanë kryer asnjë seancë stërvitore apo afrim për kampionatin e ardhshëm. Nisur nga deklarata e zëdhënësit të klubit, Rigels Malile, dy ditë më parë, ku bënte me dije se projekti i nisur më herët është duke vazhduar, atëherë për një mbarëvajtje sa më të mirë të kampionatit të 79- të të Kategorisë Superiore, kërkohet nisja e përgatitjeve një orë e më parë. Në kontrast me sezonin e fundit, ku skuadra gjirokastrite zyrtarisht u grumbullua më 3 korrik, Luftëtari i këtij sezoni duket se është në "ajër". Të gjithë futbollistët mbeten në pritje për të mësuar se kur do të jenë nën urdhrat e stafit teknik. Jo vetëm kaq, por edhe emri i trajnerit mbetet një "enigmë" më vete. Sipas drejtuesve të Luftëtarit, Milinkoviç konsiderohet si trajneri i skuadrës gjirokastrite, por 49vjeçari serb e ka mohuar një gjë të tillë. "Për një gjë jam 100% i sigurt, se nuk kam nënshkruar kontratë të re me Luftëtarin", u shpreh mes të mes të tjerave Milinkoviç në prononcimin e fundit për "Panorama Sport". Gjithsesi, nga sa mësohet, drejtuesit gjirokastritë janë të vendosur për të filluar nga puna këtë javë me qëllim grumbullimin dhe formatimin e ekipit. Nëse do të ndodhë ajo që pak mendojnë, se Mladen Milinkoviç nuk do të jetë trajneri i Luftëtarit të sezonit të ardhshëm, atëherë është koha për të gjetur "timonierin" e ri. Trajneri i ri, gjithnjë nëse Milinkoviç do të kërkojë prishjen e marrëveshjes me drejtuesit bluzinj, do të jetë pa dyshim njeriu që do të bëjë edhe merkaton e gjirokastritëve. Asnjë afrim nuk ka bërë Luftëtari momentalisht, teksa ka larguar zyrtarisht katër futbollistë. Mes katër emrave të larguar, tre janë mbrojtës dhe një mesfushor. Nën kontratë me Luftëtarin aktualisht janë mbrojtësit Beqiri, Rrapaj, Topi, Rrapo (i cili luan edhe si mesfushor, por është përdorur nga Milinkoviç si mbrojtës i krahut të majtë). Largimi i mbrojtësve Edy Nikolas Bojom, Vangjel Zguro dhe Lejdi Liçaj ka hapur një "gropë" të madhe në repartin difensiv. Ndaj zëvendësimi i tyre kërkon një angazhim më shumë nga ana e drejtuesve të Luftëtarit. Tomor Shehu