Cikalleshi, kërkesë Basaksehirit për t'u larguar
Lista e gjatë e sulmuesve, shqiptari sinjale divorci
Eka treguar në vetëm dhjetë ditë që është një nga lojtarët më në formë të Basaksehirit. Dy gola të realizuar në ndeshjet miqësore kanë treguar qartë se bomberi i Kombëtares është i uritur për minuta dhe suksese këtë edicion. Sokol Cikalleshi, sipas mediave turke, nuk do të pranojë që të rrezikojë të humbasë një tjetër sezon në stol. Për këtë, raportohet se shqiptari u ka bërë kërkesë drejtuesve të Basaksehirit që të largohet nga ekipi. Edhe pse gjatë këtyre ditëve të para që është bashkuar me ekipin në fazën përgatitore shqiptari po tregon një formë të shkëlqyer, ai sërish nuk ka të garantuar që do të ketë mjaftueshëm minutash. Kjo ka bërë që ai t'i japë skuadrës së tij sinjale divorci. RIVALITETI
Disa sulmues në skuadër, mes tyre edhe një emër si Adebajor që shihet me prioritet për vetë karrierën që ka dhe emrin që mban, e kanë zbritur Cikalleshin disa vende poshtë në listën e kandidatëve për një fanellë titullari. Kjo ka bërë që Sokol Cikalleshi të bëjë një kërkesë në klub, për t'u bërë të ditur drejtuesve dëshirën e tij për t'u larguar. "Fanatik.com" bën me dije se shqiptari nuk kërkon që të rrezikojë të humbasë edhe një tjetër sezon. AKHISAR
Sipas mediave turke, Akhisar nuk heq dorë. 9 gola të shënuar në gjysmën e dytë të sezonit të shkuar kanë bërë që kjo skuadër të vijojë interesimin për shërbimet e Cikalleshit. Bomberi kuqezi u bë një nga lojtarët më të rëndësishëm të këtij klubi duke e shpëtuar nga rreziku për rënien nga kategoria. Trajneri i Akhisar që në ditën e parë të fazës përgatitore e deklaroi si shumë të domosdoshëm shqiptarin dhe u shpreh në mediat turke se ka kërkuar që drejtuesit të bëjnë të mundur afrimin e tij sërish. Cikalleshi u transferua nga RNK Split drejt Turqisë për një shifër prej dy milionë eurosh. Në dy sezone në Turqi, shqiptari ka shënuar 23 gola me Basaksehirin dhe Akhisarin. Cikalleshi është i përfshirë në listën e Ligës së Kampionëve nga Basaksehir, i cili do të luajë fazën e tretë të kualifikueseve përballë Klub Bryzhit.