Interi bën “dopietë”, Kanselo dhe Mangala
Në tratativën me Valencian do të futet edhe Kondogbia
Interi nuk ka ndër mend më që të humbë kohë, duke parë se në fundjavë starton kampionati dhe dje ka bërë një dopiogoditje duke plotësuar repartin e mbrojtjes. Pas Shkriniar për qendrën dhe mbrojtjes dhe Dalbert për korsinë e majtë, brenda javës pritet që të zbarkojnë në Milano edhe lojtari i krahut të djathtë Zhoao Kanselo nga Valencia dhe qendërmbrojtësi Eliakuim Mangala nga Mançester Siti. KANSELO PËR KONDOGBIA
Edhe pse favorit për portugezin dukej Juventusi, Interi ka ditur që të djegë konkurrencën, duke arritur akordin me futbollistin, të cilit drejtuesit dhe stafi teknik zikaltër i kanë garantuar edhe rolin e titullarit. Edhe Interi me Valencian kanë rënë dakord, por në këtë tratativë fillimisht do të flitet për një shkëmbim kokë më kokë me mesfushorin Xhefri Kondogbia, por të shoqëruar me klauzola dhe shifra konkrete, që të dyja klubet të kenë mundësinë në verën e ardhshme për të shfrytëzuar të drejtën e blerjes së secilit. Interi ka rënë dakord me Valencian se, nëse kërkon që ta mbajë në skuadër Kanselon, do t'u paguajë 35 milionë euro spanjollëve, të cilët nga ana e tyre kanë rënë dakord me shifrën e 25 milionë eurove, nëse Kondogbia do të bindë dhe do të vazhdojë në Spanjë. Gjithsesi, në kontratën mes Kondogbias dhe Valencias do të futet edhe një klauzolë, që 20 për qind e kartonit të francezit do t'i mbetet sërish Interit, në rast të një shitjeje të mëtejshme. Dhe ndoshta që sot, qoftë mbrojtësi i djathtë Kanselo, ashtu sikurse mesfushori Kondogbia mund të bëjnë udhëtimet e anasjellta, respektivisht Valencia- Milano dhe Milano-Valencia. ZBARKON EDHE MANGALA
Për të kompletuar, më saktë për të blinduar repartin e mbrojtjes, Interi dhe Mançester Siti kanë gjetur akordin mes tyre për Eliakuim Mangala. Për këtë është e bindur e përditshmja britanike "The Sun", e cila flet për një operacion që do të sjellë francezin me origjinë kongoleze në radhët e zikaltërve, me formulën
e huazimit me kosto zero, për një vit. Madje, vetë Siti, i cili nuk po gjen një sistemim për mbrojtësin e padëshiruar nga trajneri Pep Guardiola, pritet që të paguajë edhe 30 për qind të pagës së lojtarit. Për më shumë, "The Sun" nënvizon
gjithashtu se trajneri i Interit, Luçiano Spaleti, ka shkëmbyer edhe bisedën e parë me mbrojtësin, duke i konfirmuar besimin që ka tek ai, ndonëse një ballafaqim më konkret do të bëhet kur Eliakuim Mangala të zbarkojë në Milano.